Sosial

Ana səhifə

Sosial

Almaniyanın nümayəndə heyəti Sumqayıt rəhbərliyi ilə görüşüb

04 dekabr 2009 19:17 (UTC +04:00)

Sumqayıt – APA. Bu gün Sumqayıt şəhər İcra Hakimiyyətinin başçısı Vaqif Əliyev Almaniya Federativ Respublikasının İqtisadi Əməkdaşlıq və İnkişaf Nazirliyinin (BMZ) və Almaniya İnkişaf Bankının (KfW) nümayəndə heyətini qəbul edib.

Bu barədə APA-ya Sumqayıt şəhər İcra Hakimiyyəti başçısının müşaviri Teymur Vəliyev məlumat verib. Onun sözlərinə görə, nümayəndə heyətinin tərkibinə BMZ-nin şöbə müdiri Sebastyan Leş, BMZ-nin sektor müdiri Frederik Qaul, Almaniyanın Gürcüstandakı səfirliyinin müşaviri, BMZ-nin Cənubi Qafqaz regionunda iqtisadi məsələlər üzrə əlaqələndiricisi Silke Klöver, Almaniya Texniki Əməkdaşlıq Cəmiyyətinin (GTZ) Bakıdakı ofisinin rəhbəri Frants Hayntsmann, KfW-nin Cənubi Qafqaz regionu üzrə direktoru Karsten Killian, ölkə üzrə direktoru Hayko Yannerman, Bakıdakı əlaqələndiricisi Natiq Abdullayev və GTZ-nin layihə koordinatoru Şəfiqə Hacıəhmədova daxil olub.

Qonaqları salamlayan V.Əliyev Sumqayıt şəhəri haqda ətraflı məlumat verib. Sumqayıtın sənaye şəhəri olduğunu qeyd edən şəhər başçısı son illər sənaye müəssisələrinin yenidən qurulması, kiçik və orta sahibkarlığın dəstəklənməsi, şəhər infrastrukturunun əsaslı təmiri və bərpası, genişmiqyaslı abadlıq və quruculuq işləri, eləcə də sosial sahələrin inkişafı sayəsində Sumqayıtın müasir şəhərə çevrildiyini bildirib. O, “Almaniya-Qafqaz partnyor şəhərləri arasında əməkdaşlıq” layihəsi çərçivəsində Sumqayıt şəhəri ilə Lüdviqshafen şəhərləri arasında reallaşdırılan layihələrdən danışaraq, bundan sonra da yeni layihələrin həyata keçirilməsində maraqlı olduqlarını vurğulayıb.

Səmimi qəbula və Sumqayıt haqqında geniş məlumata görə şəhər rəhbərinə minnətdarlıq edən nümayəndə heyətinin sədri S.Leş hazırda həyata keçirilən layihələrin davam etdiriləcəyinə ümidvar olduğunu bildirib. Görüşün sonunda qonaqlara Sumqayıt şəhəri haqqında kitab və bələdçi kitabçası hədiyyə edilib.

Görüşdə həmçinin Sumqayıt şəhər İcra Hakimiyyəti başçısının müavini T.Hacıyev, şəhər Memarlıq və Şəhərsalma İdarəsinin baş memar əvəzi M.Abbasov, şəhər Sukanal Törəmə Səhmdar Cəmiyyətinin direktoru M.Əsədov iştirak ediblər.