Sosial

Ana səhifə

Sosial

Azərbaycandan Rusiyaya, eləcə də Rusiyadan Azərbaycana hərəkət edən sərnişin qatarlarında sərhəd və gömrük yoxlamaları sadələşdirilib

09 dekabr 2009 13:38 (UTC +04:00)

Quba. Könül Abdullayeva-APA. Azərbaycandan Rusiya istiqamətinə, eləcə də Rusiyadan Azərbaycana hərəkət edən sərnişin qatarlarında sərhəd və gömrük yoxlamaları sadələşdirilib. APA-nın şimal bürosunun xəbərinə görə, bu barədə Azərbaycan-Rusiya sərhədinin Yalama Sərhəd Keçid Məntəqəsində “Beynəlxalq sərnişin qatarlarında gömrük və sərhəd yoxlamalarının təkmilləşdirilməsi” mövzusunda keçirilən tədbirdə bildirilib.

Tədbirdə “Azərbaycan Dəmir Yolları” Qapalı Səhmdar Cəmiyyətinin
baş mühəndisi Qurban Nəzirov, qurumun “Sərnişindaşıma” İstehsalat Birliyinin rəisi Elyar Muradov, Dövlət Gömrük Komitəsinin Gömrük Nəzarətinin Təşkili Baş İdarəsinin rəisi Şahin Bağırov, Dövlət Sərhəd Xidmətinin təmsilçiləri iştirak ediblər. Toplantıda bildirilib ki, artıq sərhəd və gömrük yoxlamalarına vaxt itkisi sərf olunmayacaq, 2 saata qədər vaxt sərfiyyatını aradan qaldıran yeni sistem “Beynəlxalq sərnişin qatarlarında sərhəd-keçid şərtlərinin sadələşdirilməsi haqqında” konvensiyanın tələblərinin yerinə yetirilməsi və sərnişinlərin rahatlığının təmin edilməsi, eləcə də Yalama Sərhəd Keçid Məntəqəsinin işinin təkmilləşdirilməsi məqsədilə tətbiq olunur.

Qeyd edilib ki, Azərbaycandan Rusiya istiqamətinə gedən sərnişin qatarlarında yoxlamalar qatarların hərəkəti boyu Xaçmaz stansiyasında başlayacaq və Yalama stansiyasında başa çatacaq. Rusiyadan Azərbaycana daxil olan qatarlarda isə yoxlamalar Yalama stansiyasında başlayacaq və Xaçmaz stansiyasında yekunlaşacaq. Sərhəd və gömrük keçid məntəqələrində nəzarətin gücləndirilməsi və xidmət şəraitinin yaxşılaşdırılması məqsədilə də bir sıra tədbirlər görülüb. Sərhədçilər üçün quraşdırılan monitorlar vasitəsilə 1500 metr məsafədə Yalama stansiyasının parkını tam müşahidə etmək, istənilən xoşagəlməz hadisənin qarşısını təxirəsalınmadan almaq mümkün olacaq.