Sosial

Ana səhifə

Sosial

Azərbaycanda ilk dəfə olaraq “Günəş energetikası terminləri lüğəti” yeddi dildə nəşr olunub

24 dekabr 2009 22:34 (UTC +04:00)

Bakı – APA. Azərbaycanda ilk dəfə olaraq “Günəş energetikası terminləri lüğəti” yeddi dildə (Azərbaycan, rus, ingilis, alman, fransız, ispan və italyan) “Elm” nəşriyyatı tərəfindən nəşr olunub.

APA-nın məlumatına görə, müəllifləri texnika elmləri namizədi Fuad Məmmədov, magistr Ülviyyə Səmədova, filologiya elmləri doktoru Qafar Hüseynov olan “Günəş energetikası terminləri lüğəti” respublikamızda günəş energetikası sahəsində olan ilk lüğətdir.

Lüğət Azərbaycan Prezidenti İlham Əliyevin “Azərbaycan Respublikasında alternativ və bərpa olunan enerji mənbələrindən istifadə olunması üzrə Dövlət Proqramı”nın təsdiq edilməsi haqqında 21 oktyabr 2004-cü il tarixli Sərəncamına uyğun olaraq nəşr edilib. Bu kitab Azərbaycan Sənaye və Energetika Nazirliyində (29 may 2008-ci il) və Azərbaycan Dillər Universitetinin Elmi Şurasında (02 aprel 2008-ci il) müzakirə edilərək müsbət rəylə nəşr edilməsi tövsiyə edilib.

Lüğət Azərbaycan Milli Elmlər Akademiyasının həqiqi üzvü, biologiya elmləri doktoru, professor Qərib Məmmədov (ixtisas üzrə) və p.e.d., professor Səməd Seyidovun (dillər üzrə) baş redaktorluğu ilə nəşr edilib. Burada redaktorlar və rəyçilər qismində respublikanın nüfuzlu alim və mütəxəssisləri iştirak ediblər.

İstifadəçilərə təqdim olunan lüğət hər biri 15000-ə yaxın termin və ya ifadə olmaqla (ümumilikdə 30 000 söz və söz birləşməsi) 2 hissədən ibarətdir. Günəş energetikası terminləri lüğətinin əsas üstünlüklərindən biri ondan ibarətdir ki, yeddi dilin hər birində əlifba sırası ilə axtarılan termin və ya ifadə yanındakı rəqəm vasitəsilə digər altı dilə birbaşa tərcümə olunur.

Lüğət Günəş energetikası sahəsində çalışan alimlər, elmi işçilər, mühəndislər, aspirantlar, tərcüməçilər mütəxəssislər, eləcə də ali təhsil müəssisələrinin müəllim və tələbələri üçün nəzərdə tutulub. Həmçinin lüğət Azərbaycanda günəş və külək energetikasının elmi əsasını qoymuş mərhum professor Həbib Məmmədbəylinin əziz xatirəsinə ithaf olunub.