Sosial

Ana səhifə

Sosial

Yaponiyanın “Ot kökləri və insan təhlükəsizliyi” qrant yardım proqramı çərçivəsində layihələrin imzalanma mərasimi keçirilib

25 dekabr 2009 09:44 (UTC +04:00)

Bakı. Laçın Sultanova-APA. Bu gün Yaponiyanın Azərbaycandakı səfirinin iqamətgahında Yaponiya hökumətinin “Ot kökləri və insan təhlükəsizliyi” qrant yardım proqramı çərçivəsində layihələrin imzalanma mərasimi keçirilib. APA-nın xəbərinə görə, tədbirdə qeyd olunub ki, Yaponiya hökuməti Azərbaycana daha 8 qrant ayrılıb.
Qrantların verilməsi ilə bağlı müqavilələri Yaponiya hökuməti tərəfindən bu ölkənin Azərbaycandakı səfiri Masamitsu Oki, Azərbaycan tərəfdən isə 7 QHT rəhbəri və 1 rayon təhsil şöbəsinin rəhbəri imzalayıb. Qeyd olunub ki, layihələrə ayrılan ümumi qrant yardımının məbləği 763 min 982 ABŞ dollarıdır.

Tədbirdə çıxış edən Yaponiyanın Azərbaycandakı səfiri Masamitsu Oki deyib ki, Yaponiya hökumətinin “Ot kökləri və insan təhlükəsizliyi” qrant yardım proqramı çərçivəsində Azərbaycanda ümumi məbləği 9 293 567 ABŞ doları olan 128 layihə həyata keçirilib.
Səfir iki il əvvəl Azərbaycanın Şəki rayonuna səfər etdiyini xatırladaraq orada çaylara tullantılar töküldüyünün şahidi olduğunu da qeyd edib: “Mən çox təəccübləndim. Qərara gəldik ki, orada təmizlənmə prosesi həyata keçərək. Mən Şəkini Yaponiyanın Kioto şəhərinə bənzədirəm”.

Qeyd olunub ki, imzalanan qrant müqavilələrdən biri də Şəki şəhəri Gəncəli və Dərə Hamamı icmalarında çayların təmizlənməsi və bərpası layihəsi ilə bağlıdır.

Başqa bir layihə isə Quba rayonunun ikinci Nügədi kəndində 1 saylı orta məktəbin təmiri layihəsidir.
Tədbirdə iştirak edən Azərbaycanın təhsil naziri Misir Mərdanov çıxışında Yaponiyanın Azərbaycanda davamlı olaraq təhsil sahəsində layihələr həyata keçirdiyini deyib. Onun sözlərinə görə, bu il Yaponiya ilə Azərbaycan arasında təhsil sahəsində çox ciddi addımlar atılıb. Nazir deyib ki, Azərbaycanda 3 orta məktəbdə yapon dili tədris olunur.