Sosial

Ana səhifə

Sosial

Misir Mərdanov: “Tələbə Qəbulu üzrə Dövlət Komissiyası ilə Təhsil Nazirliyi arasında səmimi və qarşılıqlı əməkdaşlıq var”

26 dekabr 2009 10:52 (UTC +04:00)

Bakı. Elnur Məmmədli – APA. “Tələbə Qəbulu üzrə Dövlət Komissiyası ilə Təhsil Nazirliyi arasında səmimi və qarşılıqlı əməkdaşlıq mövcuddur. Çünki bizim məqsədimiz eynidir - Azərbaycanda təhsilin səviyyəsini yüksəltmək”. APA-nın məlumatına görə, bu sözləri təhsil naziri Misir Mərdanov Tələbə Qəbulu üzrə Dövlət Komissiyası və Təhsil Nazirliyinin mərkəzləşmiş buraxılış imtahanları ilə qəbul imtahanlarının göstəricilərinin birgə ekspertizasına başlaması mövzusunda jurnalistlərin sualını cavablandırarkən deyib. M. Mərdanov TQDK-nın bütün təklifləri ilə razılaşdığını bildirib: “Bu il bazanı bir qədər gec verdik. Bazanı verdikdən sonra TQDK-dan səmərəli təkliflər aldıq. Gələcək işimizdə həmin təklifləri nəzərə alacağıq. TQDK bu işi 1992-ci ildən, Təhsil Nazirliyi isə 2 ildir aparır. Ona görə də müsbət nəticəni öyrənmək, onların biliyindən, təcrübəsindən yararlanmaq bizim qəbul etdiyimiz şərtlərdəndir”.

M. Mərdanovun sözlərinə görə, TQDK otaqda imtahan verən şagirdlərin hər birinə fərqli variantların verilməsini dəstəkləyir: “İmtahanların sayının çox olmasından narahatlıq ifadə edirlər. Səbəb kimi isə bildirirlər ki, bir nəfərin qiymətini 8 sualla müəyyənləşdirmək olmaz. Mən bununla tamamilə razıyam. Ona görə də biz gələn il imtahanların sayının azaldılması, sualların sayının artırılması barədə düşünəcəyik. Eyni zamanda çətin, orta və asan suallarla bağlı təkliflər verilib”.

Nazir orta məktəblərdəki buraxılış imtahanlarında köçürmə hallarının qarşısının alınması üçün tədbirlərin görüləcəyini də söyləyib: “Bəzən bilərəkdən, bəzən gücümüz çatmadığına görə belə hallar baş verir. İki il ərzində bununla bağlı problemlərlə qarşılaşdığımız danılmazdır. Biz addım-addım bu problemləri həll edəcəyik. Köçürmələrin qarşısının alınmasına çalışacağıq. Əvvəlcədən elan edəcəyik ki, başqasından kömək almış, köçürmüş uşaqların qiyməti ləğv ediləcək. Yerli təhsil şöbələri kömək etmək istiqamətində deyil, uşaqları daha yaxşı hazırlaşdırmaq istiqamətində iş aparmalıdır”.

M. Mərdanov onu da əlavə edib ki, ali məktəblərə qəbul Təhsil Nazirliyinin müdaxiləsi olmadan keçirilir və buna görə də o, tələbə qəbulunu qiymətləndirə bilməz: “Mən düşünürəm ki, bu imtahanlar mərkəzləşmiş qaydada olsa, daha məqsədəuyğundur”.

məleykə_misir