Sosial

Ana səhifə

Sosial

Gürcüstanın Marneuli rayonunda 54 Azərbaycan dilli məktəb fəaliyyət göstərir

09 yanvar 2010 07:19 (UTC +04:00)

Marneuli. Nizami Məmmədzadə-APA. “Gürcüstanın Marneuli rayonunda ötən il maarif sahəsində çoxlu uğurlar olub”. Bu barədə APA-nın Gürcüstan bürosuna Marneuli rayon Təhsil Resursları Mərkəzinin rəhbəri Kamandar İsmayılov bildirib. Onun sözlərinə görə, ilk uğur məktəblərin tikintisi və təmiri sahəsində olub: “Keçən il böhran rayonda 3 Azərbaycan dilli məktəb Avropa standartları səviyyəsində yenidən tikilib istifadəyə verilib. Məktəblərdən biri Gürcüstan təhsil və elm nazirliyinin maliyyə dəstəyi ilə tikilib. Bir neçə orta məktəbdə əsaslı təmir işləri görülüb, məktəb korpuslarına yeni tikililər əlavə edilib, istilik sistemləri yenidən qurulub, qapı-pəncərələr dəyişdirilib”.

K. İsmayılov bildirib ki, Marneulidə 54 Azərbaycan dilli məktəb fəaliyyət göstərir. Məktəblərin yeni texnoloji qurğular, kompüterlər, tədris vəsaitləri və dərsliklərlə müntəzəm təmin edilməsi yüksək və keyfiyyətli təhsil üçün önəmlidir: “İki ildir ki, Marneulidə 25 Azərbaycan dilli məktəbdə Azərbaycanın Diasporla iş üzrə Dövlət Komitəsinin dəstəyi ilə dövlət dilinin öyrədilməsinə dair layihələrin həyata keçirilməsi öz müsbət nəticələrini verməkdədir. İndi şagirdlərin əksəriyyəti müstəqil olaraq gürcü dilində danışa bilir və ölkə miqyasında keçirilən müxtəlif tədbirlərdə cəsarətlə iştirak edirlər”.

Qeyd edək ki, ötən il Gürcüstanın Təhsil və Elm Nazirliyi yeni təhlükəsizlik prinsiplərinə və Avropa standartlarına uyğun 22 məktəb tikməyi qərara alıb. Yaponiyanın Gürcüstandakı səfirliyi isə ötən ilin son günlərindən Marneuli rayonunun Axlılələ kəndində yeni məktəb tikintisinə başlayıb. Bunun üçün səfirlik 72. 832 ABŞ dolları vəsait ayırıb. Marneulidəki 7 saylı məktəbdə isə Heydər Əliyev Fondunun dəstəyi ilə əsaslı təmir işləri aparılır.