Sosial

Ana səhifə

Sosial

Nazirlik: ““Donuz qripi” ilə bağlı vaksinin kənar təsirlərinin meydana çıxa bilməsinə baxmayaraq, bu təsirlərin əksəriyyəti mülayim və müvəqqəti xarakterlidir”

13 yanvar 2010 08:33 (UTC +04:00)

Bakı. Kəmalə Quliyeva – APA. “Bu qunə qədər əldə edilən məlumata əsasən, AH1N1 virusuna (“donuz qripi”) qarşı vaksinin təhlükəsizlik göstəriciləri digər vaksinlərdə olduğu kimidir. Vaksinin təsadüfi kənar təsirlərinin meydana çıxa bilməsinə baxmayaraq, bu təsirlərin əksəriyyəti mülayim və müvəqqəti xarakterlidir”. Səhiyyə Nazirliyinin mətbuat xidmətindən APA-ya verilən məlumata görə, artıq dünəndən etibarən “GlaxoSmithKlein” şirkəti tərəfindən istehsal edilmiş H1N1 pandemik qripə qarşı inaktivləşdirilmiş vaksinlərin paylanmasına başlanılıb. İlkin mərhələdə gətirilən vaksinlər əsasən risk qrupuna daxil olan vətəndaşlara könüllü olaraq vurulacaq.
Qrip pandemiyasının yayılması barədə açıqlamadan sonra, Birləşmiş Millətlər Təşkilatının baş katibi və Ümumdünya Səhiyyə Təşkilatının (ÜST) baş direktoru pandemiyaya qarşı peyvəndin qərəzsiz paylanmasını təmin etmək üçün beynəlxalq ictimaiyyəti həmrəy olmağa və bu işdə yardımçı olmağa çağırıb. Bir çox inkişaf etmiş ölkələr ÜST-ün ehtiyat fonduna (öz əhalisi üçün nəzərdə tutulan) peyvənd təqdim etməklə bu çağırışa cavab veriblər. Peyvənd istehsalçıları da ehtiyat fondunu peyvəndlə təchiz edib. Avropa regionunda münasib olan səkkiz ölkə ÜST ehtiyatlarından təmənnasız verilən vaksinləri əldə etmək istəyində olduqlarını bildirib. Hazırda ÜST bu təcili təchizatın təqribən 200 milyon doza pandemik vaksin təşkil edəcəyini hesablayıb. Bu təchizatın həmin ölkələrin əhalisinin yalnız 10 faizə qədərini əhatə edəcəyi gözlənilir. Azərbaycan öz marağını ifadə edən birinci ölkələrdən olub. Öz marağını ifadə edərək Azərbaycan hökuməti vaksinlərin tətbiqi planını işləyib hazırlayıb və ÜST ilə Məktub Sazişi imzalayıb.
Qeyd edilib ki, hökumət səhiyyə işçilərini, güc strukturlarını və bir sıra risk qrupuna daxil olan vətəndaşları vaksinləri qəbul edəcək birinci qrup kimi nəzərə alır. Bu, onları yoluxmadan qorumaq və pandemik qripin hökm sürdüyü dövr ərzində səhiyyə sisteminin işləməyə və tibbi xidmət göstərməyə davam etmək iqtidarında olmasını təmin etmək məqsədi daşıyır. Hökumət, xroniki xəstəlikləri olan şəxslərin və hamilə qadınların da birinci növbədə vaksinlə təmin edilməsini nəzərdə tutur. Çünki H1N1 virusunun belə əhali qrupları arasında yayılma riskləri daha yüksəkdir.
ÜST bir sıra ölkələr və vaksin istehsalçıları tərəfindən bağışlanmış pandemik vaksinlərin təcili paylaşdırılması işini koordinasiya etməkdədir.