Sosial

Ana səhifə

Sosial

“2010-2013-cü illərdə Azərbaycan Respublikasının orta ixtisas təhsili sistemində islahatlar üzrə Tədbirlər Proqramı” təsdiqlənib

15 yanvar 2010 09:25 (UTC +04:00)

Bakı. Kəmalə Quliyeva – APA. Azərbaycan Nazirlər Kabineti “2010-2013-cü illərdə Azərbaycan Respublikasının orta ixtisas təhsili sistemində islahatlar üzrə Tədbirlər Proqramı"nı təsdiq edib. Bu barədə APA-ya Nazirlər Kabinetindən məlumat verilib.

Tədbirlər proqramının əsas məqsədi orta ixtisas təhsili sisteminin inkişaf etdirilməsi, ölkə iqtisadiyyatının inkişaf istiqamətlərinə əsasən əmək bazarının tələbatına uyğun olaraq istehsal və xidmət sahələrinin yüksək keyfiyyətli orta ixtisaslı kadrlarla təmin edilməsindən ibarətdir. Proqram çərçivəsində orta ixtisas təhsilində aşağıdakı istiqamətlər üzrə islahatların aparılması nəzərdə tutulur: orta ixtisas təhsilinin normativ-hüquqi bazasının təkmilləşdirilməsi, təhsilin məzmununun və təlim texnologiyalarının yeniləşdirilməsi, orta ixtisas təhsili strukturunun və idarə olunması sisteminin modernləşdirilməsi, orta ixtisas təhsilində keyfiyyətin təmin olunması, orta ixtisas təhsilində kadr hazırlığı, orta ixtisas təhsilinin maddi-texniki bazasının müasir tələblərə uyğun qurulması, orta ixtisas təhsilinin maliyyələşdirilməsinin yeni mexanizmlərinin yaradılması.

Proqrama əsasən mövcud normativ hüquqi baza beynəlxalq təcrübəyə əsaslanaraq yeniləşdiriləcək, orta ixtisas təhsili ixtisasları əmək bazarının tələblərinə və ali təhsilin bakalavr pilləsinin ixtisaslarına uyğunlaşdırılacaq, orta ixtisas təhsili müəssisələrinin akkreditasiyasına müstəqil ekspertlərin cəlb edilməsi təmin olunacaq, tələbələrin biliyinin qiymətləndirilməsi üçün çoxballı sistem və kredit sistemi tətbiq ediləcək, orta ixtisas təhsili müəssisələrinin fəaliyyətləri haqqında ictimaiyyətə müntəzəm hesabatvermə sistemi yaradılacaq, pedaqoji kadrların attestasiyasının yeni mexanizmi, orta ixtisas təhsili müəssisələrində keyfiyyəti təmin edən menecment sistemi, əmək bazarının monitorinqi və işədüzəltmə-karyera mərkəzləri, dövlət və biznes strukturlarının sifarişləri əsasında məqsədli mütəxəssis hazırlığı mexanizmi və müəllimlərin ixtisaslarının artırılması üçün müvafiq treninqlər sistemi yaradılacaq. Proqramda orta ixtisas təhsili müəssisələrinin yerləşdiyi bina və tikililərin müasir tələblərə uyğun əsaslı və cari təmir olunması, müasir texnika, texnologiya vasitələri ilə təmin edilməsi, təlim avadanlıqlarının yeniləşdirilməsi, tədris prosesində yeni təlim texnologiyalarının tətbiqinə nail olunması, elmi-metodik və informasiya təminatının yaxşılaşdırılması, orta ixtisas təhsili müəssisələrinin maliyyələşdirilməsinin yalnız dövlət büdcəsindən deyil, təhsil alan subyektlərin maliyyəsi hesabına həyata keçirilməsi, təhsil xidmətlərinin sahələrini genişləndirməklə, alternativ maliyyələşmə mənbələrinin formalaşdırılması sisteminin yaradılması da nəzərdə tutulur.