Sosial

Ana səhifə

Sosial

Rusiyanın ali təhsil müəssisələrinin başçıları Bakıda tələbələrlə görüş keçiriblər

23 yanvar 2010 12:44 (UTC +04:00)

Bakı. Laçın Sultanova - APA. Bu gün M.Lomonosov adına Moskva Dövlət Universitetinin Bakı filialında «Humanitar əməkdaşlıq üzrə I Azərbaycan-Rusiya Forumu»nun iştirakçılarının bu ali təhsil ocağının müəllim heyəti və tələbələri ilə görüşü keçirilib. APA-nın məlumatına görə, Universitetin rektoru Nərgiz Paşayeva artıq iki il fəaliyyət göstərən ali təhsil ocağı haqqında ətraflı məlumat verib. Onun sözlərinə görə, Universitetin Bakı filialında hazırda 4 fakültə fəaliyyət göstərir və bu tədris ili üçün keçirilən qəbul imtahanları zamanı yüksək rəqabət müşahidə olunub. Belə ki, riyaziyyat fakültəsində 1 boş tələbə yerinə 5 abituriyent, filologiya fakültəsində - 4 abituriyent düşüb.

«Bu cür görüşlərin keçirilməsi ümumi problemləri müzakirə etməyə imkan yaradır, fikir, söz və baxışların vahidliyi istənilən sivil ölkənin həyatında mühüm rol oynayır. Bu münasibətlər ümumi mədəni-mənəvi dəyərlərin qorunduğunu göstərir. Azərbaycanda tarixən özündə bilik, yəni nur daşıyan savadlı insanlara, alimlərə böyük hörmətlə yanaşıblar. İnsan bütün həyatı boyu oxuyur, universitet isə onun intellektual cəhətdən formalaşdığı bir yerdir», - deyə N.Paşayeva bildirib.

Moskva Dövlət Beynəlxalq Münasibətlər İnstitutunun rektoru Anatoli Torkunov isə toplantı iştirakçılarına başçılıq etdiyi ali təhsil ocağının tarixi və fəaliyyəti haqqında danışıb və əvvəllər bu institutun MDU-nun bir bölməsi olduğunu vurğulayıb. «Azərbaycanın ali məktəbi öz yüksək intellektuala sahib olan tələbələri ilə məni hər zaman heyrətləndirib. Əminəm ki, MDU-nun Bakı filialının tələbələri öz ölkələri üçün dəyərli və yüksək təhsilli insan olacaqlar», - deyə A.Torkunov bildirib.

Daha sonra A.Torkunov və Rusiya Dövlət Qulluğu Dövlət Akademiyasının rektoru Vladimir Yeqorov tələbələrin suallarını cavablandırıblar. Görüşdə həmçinin Azərbaycanın təhsil naziri Misir Mərdanov, Azərbaycan Diplomatiya Akademiyasının rektoru Hafiz Paşayev, «Russkiy Mir» Fondunun başçısı, RF-nin Azərbaycandakı sabiq səfiri Vasili İstratov və digər şəxslər iştirak ediblər.