Sosial

Ana səhifə

Sosial

Bakıda “Vətəndaş cəmiyyətinin inkişafı və QHT-lərin dövlət tərəfindən maliyyələşdirilməsi: qazanılmış təcrübə və yeni imkanlar” mövzusunda beynəlxalq konfrans keçirilir

25 noyabr 2010 08:20 (UTC +04:00)

APA-nın xəbərinə görə, tədbiri QHT-lərə Dövlət Dəstəyi Şurasının sədri Azay Quliyev açaraq, Azərbaycanda vətəndaş cəmiyyətinin davamlı inkişafının QHT-lərin fəaliyyətinin genişlənməsinə imkan yaratdığını deyib. Dövlətin QHT-lərin inkişafı ilə bağlı atdığı addımlardan danışan A. Quliyev konfransda Bakı bəyannaməsinin qəbuluna ehtiyac olduğunu bildirib.

Tədbirdə baş nazirin müavini, Beynəlxalq Humanitar Yardım üzrə Dövlət Komissiyasının sədri Əli Həsənov da çıxış edib. Ə. Həsənov deyib ki, vətəndaş cəmiyyətinin inkişafında milli adət-ənənələr və xalqın psixologiyası nəzərə alınmalıdır. Bu gün Azərbaycanda 2606 QHT-nin qeydiyyatdan keçdiyini deyən baş nazirin müavini, bir neçə il bundan öncəyə qədər Azərbaycanda fəaliyyət göstərən beynəlxalq təşkilatlarda çalışan işçilərin 95 faizinin xaricilər, bu gün isə azərbaycanlılar olduğunu söyləyib.
Ə. Həsənov dünyada müstəqil QHT-lərin olmadığını da deyib: “Əgər QHT hansısa donor təşkilat tərəfindən maliyyələşdirilsə, o asılıdır, müstəqil deyil. Azərbaycanda müstəqil QHT-lərin formalaşdırılmasına çalışmalıyıq”.

Tədbirdə ABŞ Beynəlxalq İnkişaf Agentliyinin (USAİD) Azərbaycan üzrə koordinatoru Kit Simons, “Kounterpart İnternational” təşkilatının vitse-prezidenti Arleni Lear, ATƏT-in Bakı Ofisinin rəhbəri Əli Bilge Cankorel, Açıq Cəmiyyət İnstitutu - Yardım Fondunun icraçı direktoru Fərda Əsədov çıxış ediblər.

Konfrans paralel sessiyalarda işini davam etdirir. Tədbir sabah başa çatacaq. Sonda Bakı Bəyannaməsinin qəbul olunması nəzərdə tutulur.