Sosial

Ana səhifə

Sosial

Azərbaycan Dünya Sosial Təminat Forumunda iştirak edəcək

25 noyabr 2010 08:39 (UTC +04:00)

Bakı - APA-Economics. Cari ilin 29 noyabr - 04 dekabr tarixlərində Cənubi Afrika Respublikasının Keyptaun şəhərində Dünya Sosial Təminat Forumu keçiriləcək.

Azərbaycan Dövlət Sosial Müdafiə Fondunun İctimaiyyətlə əlaqələr sektorundan “APA-Economics”ə verilən məlumata görə, Beynəlxalq Sosial Təminat Assosiasiyası (BSTA) və Cənubi Afrika Respublikasının Sosial İnkişaf Departamentinin birgə təşkilatçılığı ilə baş tutacaq Forumda Azərbaycan Respublikası Dövlət Sosial Müdafiə Fondunun sədri Səlim Müslümov iştirak edəcək.

Dünya Sosial Təminat Forumunda müxtəlif ölkələrin pensiya və sosial sığorta təşkilatlarının rəhbərləri, beynəlxalq təşkilatların nümayəndələri, siyasətçi və alimlərin iştirakı nəzərdə tutulur. Forumda iqtisadi böhran şəraitində sosial təminat sahəsində inkişaf və tendensiyalar, sosial təminat təşkilatlarının idarə olunmasında yeni yanaşmaların müəyyən olunması, əksər dünya ölkələri üçün ciddi problem olan demoqrafik vəziyyətin və başqa mövzuların müzakirəsi planlaşdırılır.

Forum çərçivəsində BSTA-nın 30-cu Baş Assambleyası, Büro və Şurasının iclasları da keçiriləcəkdir. Hər üç ildən bir keçirilən BSTA-nın Baş Assambleyasında təşkilatın Prezidenti, Baş katibi, Xəzinədarı, Nəzarət komissiyasının üzvləri və texniki komissiyaların sədrləri kimi yüksək vəzifələrə seçkilər təşkil olunur.

Xatırladaq ki, Azərbaycanın sığorta-pensiya modelinin nüfuzlu beynəlxalq təşkilatlar və maliyyə institutları tərəfindən yüksək qiymətləndirilməsinin nəticəsi kimi, 2004-cü ildə ölkəmiz BSTA-nın büro üzvü, 2007-ci ildə isə inkişaf etmiş Avropa ölkələri ilə bir sırada Assosiasiyanın Avropa Şəbəkəsinin Rəhbər Komitəsinin üzvü seçilib. Ölkəmiz Assosiasiya çərçivəsində yüksək səviyyədə müvafiq qərarların qəbul edilməsində xüsusi rola malikdir.

Bütün bunlar nəzərə alınmaqla Dünya Sosial Təminat Forumunda BSTA-nın İnformasiya texnologiyaları komitəsinin 4 əsas mövzusundan 2-si (“Masştabı genişlənən avtomatlaşdırılmış idarəetmə sistemləri” və “Sığorta-pensiya sistemlərində aktuar tədqiqatların təşkili və qərar qəbul etmə üsulları”) üzrə əsas məruzələr Azərbaycan nümayəndələrinə həvalə edilib.