Sosial

Ana səhifə

Sosial

Bu günədək Azərbaycanda QİCS-dən 318 nəfər ölüb

26 noyabr 2010 10:00 (UTC +04:00)

Bakı. İlhamə İsabalayeva-APA. Bu gün “Azərbaycanda İİV – infeksiyası/QİÇS-ə aid profilaktika, müalicə və sosial dəstəyə universal əl çatma tədbirlərində Əmək və Əhalinin Sosial Müdafiəsi Nazirliyinin rolu” mövzusunda seminar keçirilib. APA-nın məlumatına görə, Əmək və Əhalinin Sosial Müdafiəsi Nazirliyinin (ƏƏSMN) beynəlxalq əməkdaşlıq şöbəsinin müdiri Elnur Sultanov bildirib ki, Beynəlxalq Əmək Təşkilatının bu il keçirilən 99-cu sessiyasında QİÇS-ə qarşı mübarizə ilə bağlı ölkələrə tövsiyələr verilib. Həmin tövsiyə Azərbaycana da təqdim edilib. E. Sutanovun sözlərinə görə, ƏƏSM həmin tövsiyələrə nəzərə alaraq, ölkə səviyyəsində tədbirlərin icrasına başlayıb.

Respublika QİÇS-ə Mübarizə Mərkəzinin direktoru Həqiqət Qədirova isə deyib ki, ilk dəfə 1981-ci ilin iyunun 5-də ABŞ-da 5 gəncin İnsanın İmmunçatışmazlığı Virusuna (İİV) yoluxma ilə bağlı məlumat verilib. 1988-ci ildə isə 1 dekabr BMT tərəfindən Ümumdünya QİÇS-lə Mübarizə Günü elan edilib. Mərkəz direktorunun sözlərinə görə, bu xəstəliyə cinsi yolla daha çox yoluxulur. Tatuaj, qulaq deşmə də yoluxmanın mənbəyidir, hava-damcı yolu ilə isə bu xəstəliyə yoluxulmur.

H. Qədirova deyib ki, aparılan tədbirlər nəticəsində artıq dünyada İİV-ə yoluxma və bu xəstəlikdən ölüm halları azalıb. Son 3 ildə Azərbaycanda da İİV-ə yoluxma ilə bağlı vəziyyət stabil qalır: “Amma bu, bizi arxayın qoya bilməz. Azərbaycanın da daxil olduğu Şərqi Avropa regionunda hələ artım müşahidə edilir. MDB ölkələri arasında isə Azərbaycanda İİV-ə yoluxma səviyyəsi yüksək deyil”.

Mərkəz direktorunun sözlərinə görə, Azərbaycanda İİV-ə yoluxmuş 2 mindən çox insan var. Hazırda infeksiyaya yoluxanların 554 nəfəri xəstəliyin QİÇS mərhələsindədir. İndiyədək Azərbaycanda QİCS-dən 318 nəfər dünyasını dəyişib. Bu xəstəlik daha çox 19-50 yaş arasında özünü göstərir ki, bu da ümumilikdə İİV-ə yoluxanların 92 faizini təşkil edir. İnfeksiyaya yoluxmuş Azərbaycan vətəndaşlarının 64 faizi isə bu infeksiyaya şüurlu şəkildə - narkotiklərin istifadəsi nəticəsində yoluxub: “Ən çox yoluxma halları Şirvan, Hacıqabul, Lənkəran, Sumqayıt və Astaradadır. Bu isə narkotrafikin yoludur.”