Sosial

Ana səhifə

Sosial

Ombudsmanın təşəbbüsü ilə 1 dekabr – AİDS-lə mübarizə gününə həsr olunmuş tədbir keçirilib

30 noyabr 2010 10:36 (UTC +04:00)

Bakı-APA. İnsan Hüquqları üzrə Müvəkkil Elmira Süleymanovanın təşəbbüsü ilə 1 dekabr – Ümumdünya AİDS-lə mübarizə günü münasibətilə Azərbaycan Uşaq və Gənclərin Sülh Şəbəkəsinin nəzdində Liderlik Məktəbində tədbir keçirilib. Ombudsman Aparatının mətbuat xidmətindən APA-ya verilən məlumata görə, tədbirin məqsədi bu problemin bir daha diqqətə çatdırılması, Azərbaycanın AİDS-ə qarşı mübarizə istiqamətində görülən işlər barədə uşaqların məlumatlandırılması olub.

Tədbirdə BMT-nin Narkotiklər və Cinayətkarlıqla Mübarizə İdarəsinin (UNODC) layihə rəhbəri Arzu Quliyeva, Səhiyyə Nazirliyinin AİDS-lə Mübarizə Mərkəzinin direktoru Həqiqət Qədirova, nazirliyin Elmi Tədqiqat Mamalıq və Ginekologiya İnstitutunun əməkdaşı Leyla Məmmədova, Ombudsman Aparatının əməkdaşları, valideynlər və şagirdlər iştirak ediblər.
E.Süleymanova fəaliyyətində digər hüquqlarla yanaşı, AİDS-ə yoluxmuş şəxslərin hüquqlarının müdafiəsinin mühüm yer tutduğunu, bu sahədə UNODC və AİDS-lə Mübarizə Mərkəzi ilə sıx əməkdaşlıq əlaqələrinin yaradıldığını diqqətə çatdırıb.

Ombudsman Azərbaycanda bu xəstəliyə yoluxmuş 2 mindən çox insanın olduğunu, bu amansız xəstəliyin cavanlaşdığını və artıq uşaqlar arasında da yayıldığını təəssüf hissi ilə qeyd edib. Ombudsmanın AİDS-lə Mübarizə Mərkəzi ilə birlikdə həmin xəstəliyə tutulmuş insanların hüquqlarının müdafiəsi və bu sahədə geniş maarifləndirmə işi aparılması istiqamətində dəfələrlə silsilə tədbirlər keçirdiyi, AİDS əleyhinə təbliğat məqsədilə əhaliyə lazımi bilgilər aşılandığı, yeniyetmələr və gənclər üçün treninq-seminarlar təşkil olunduğu, yerli KİV-də müvafiq maarifləndirici yazıların verildiyi, televiziya və radio verilişlərinin səsləndirildiyi nəzərə çatdırılıb.

Qeyd olunub ki, Ombudsmanın Gəncə, Quba, Şəki və Cəlilabad regional mərkəzlərinin əməkdaşları da AİDS-lə mübarizə günü ilə əlaqədar silsilə tədbirlər keçirib, Müvəkkilin bu xəstəliyə tutulanların hüquqlarının müdafiəsi sahəsində gördüyü işlər haqqında məlumat veriblər.

AİDS-lə Mübarizə Mərkəzinin direktoru Həqiqət Qədirova Ombudsmanın AİDS-ə tutulmuş xəstələrin hüquqlarının müdafiəsi istiqamətində fəaliyyətini yüksək dəyərləndirib, uşaqların üçün bu maarifləndirici tədbirin təşkilinə görə Müvəkkilə təşəkkürünü bildirib. O, Azərbaycanda AİDS-dən 318 nəfərin dünyasını dəyişdiyini, ölkə vətəndaşlarının 64 faizinin bu xəstəliyə narkotiklərdən istifadə nəticəsində yoluxduğunu söyləyib, bu xəstəliklə mübarizə istiqamətində görülən işlər və qarşıda duran mühüm vəzifələr barədə danışıb, bu amansız xəstəliyin qarşısının alınmasının yalnız birgə səylərlə mümkün olduğunu vurğulayıb.

AİDS