Sosial

Ana səhifə

Sosial

Azərbaycan Tələbə Qəbulu üzrə Dövlət Komissiyası heç bir abituriyenti ali məktəbə daxil olmayan orta məktəblərin adını açıqlayıb

09 fevral 2011 12:43 (UTC +04:00)

Komissiyanın ictimaiyyətlə əlaqələr sektorundan APA-ya verilən məlumata görə, TQDK sədri Məleykə Abbaszadə bildirib ki, Sumqayıtın orta ümumtəhsil məktəblərini 2010-cu ildə 3595 şagird bitirib və onların 3418 nəfəri attestat alıb. Şəhərin 1303 məzunu tələbə adını qazanıb. Şəhərin məzunlarının 372 nəfəri 500-dən, 103 nəfəri 600-dən yuxarı bal toplayıb. Abituriyentlərin ən çoxu Azərbaycan Dövlət İqtisad Universiteti, Sumqayıt Dövlət Universiteti və Bakı Dövlət Universitetinə qəbul olub. Şəhərin abituriyentlərinin qəbul imtahanlarında topladıqları orta bal 259.632-yə bərabərdir ki, bu da ölkə üzrə orta göstəricidən 12% yuxarıdır. Qəbul imtahanlarında 49 məktəbin məzunları iştirak edib. Bu məktəblərdən 42 saylı orta məktəbin bir abituriyenti belə ali təhsil müəssisəsinə qəbul olmayıb.

Abşeron rayonunun 376 məzunu tələbə adını qazanıb. Rayonun abituriyentlərinin qəbul imtahanlarında topladıqları orta bal 221.448-ə bərabərdir ki, bu da ölkə üzrə orta göstəricidən 2,1% aşağıdır.

Şabran rayonunun 70 məzunu ötən il tələbə adını qazanıb. Rayon abituriyentlərinin qəbul imtahanlarında topladıqları bal ölkə üzrə orta göstəricidən 20,8% aşağıdır. Qəbul imtahanlarında 19 məktəbin məzunları iştirak edib. Bu məktəblərdən Gəndab, İ. Abbasov adına Rəhimli, Təzəkənd, Pirəbədil, H. Əliyev adına Dağbilici və C. Məmmədov adına Aygünlü kənd orta məktəblərinin bir abituriyenti belə ali təhsil müəssisəsinə qəbul olmayıb.

Qobustan rayonunun abituriyentlərinin qəbul imtahanlarında topladıqları orta bal respublika üzrə orta göstəricidən 26,7% aşağıdır. Qəbul imtahanlarında Hilmilli, M. Sahibov adına Ərəbqədim və Cəyirli kənd orta məktəblərinin bir abituriyenti belə ali təhsil müəssisəsinə qəbul olmayıb. Ə. İbrahimov adına Nabur, Hilmilli, M. Sahibov adına Ərəbqədim və Cəyirli kənd orta məktəblərinin abituriyentlərinin topladığı orta bal 100-dən aşağıdır.

Qubadan isə Qırmızı qəsəbə 1 saylı, A. Aslanov adına Qonaqkənd qəsəbə, M. Məmmədsalahov adına Cimi, Ərməki, R. Əliyev adına Barlı, Ş. Şahbalayev adına Hacıhuseynli, Z. Əkbərov adına Xucbala, A. Babayev adına Susay, İ. Şahmərdanov adına Qəcrəş, N. Dadaşov adına İspik, Möhuc, Pustəqasım, U. Mikayılov adına Şuduq, D. İsmayılov adına Cici, C. Bayramov adına Zərqova, Şəmiyev qardaşları adına İsnovqışlaq, C. Mursəlov adına Vəlvələ, F. Heybətov adına Talabıqışlaq, R. Kəlbiyev adına Xınalıq, Guləzi, Ə. Rustəmov adına Zizik, C. Mustafayev adına Alıc-Digah, M. Zöhrabov adına Paşaoba, Dağlı, Aşağı Atuc və Utuq kənd orta məktəblərinin, eləcə də Zərdabi kənd yetim və valideyn hüququndan məhrum uşaqlar ucun internat orta məktəbinin bir abituriyenti belə ali məktəbə qəbul olmayıb.

Qubadlı rayonunun qəbul imtahanlarında iştirak edən 30 məktəbindən Teymur Muskanlı kənd orta məktəbinin bir abituriyenti belə ali təhsil müəssisəsinə qəbul olmayıb.

Qusar rayonunun 41 məktəbindən İnternat orta məktəbinin, Samur qəsəbə, Urva, Sudur, M. Abdullayev adına Əcəxur, Gədəzeyxur, Aşağı X. Səfərov adına Ləyər, Qaratoba, Köhnə Xudat, Quxur oba, Xurəl, Avaran, Cağarqışlaq, Nəcəfkənd və Böyük Muruq kənd orta məktəblərinin, Siyəzən rayonunun qəbul imtahanlarında iştirak edən 13 məktəbindən 4 saylı şəhər, R. Abdulrəhimov adına Gil-Gilcay qəsəbə, Y. İbrahimov adına Zarat və Balaca Həmyə kənd orta məktəblərinin heç bir abituriyenti ali məktəbə daxil ola bilməyib.

TQDK_Məleykə