Sosial

Ana səhifə

Sosial

Azərbaycan prezidenti Tovuzda mədəniyyət və istirahət parkının açılışında iştirak edib

09 fevral 2011 18:26 (UTC +04:00)

Bakı-APA. Fevralın 9-da prezident İlham Əliyev Tovuz şəhərində mədəniyyət və istirahət parkının açılışında iştirak edib. Bu barədə APA “Azərtac”a istinadən məlumat verir.
Dövlət başçısına məlumat verilib ki, parkın tikintisinə 2009-cu ilin əvvəllərində başlanıb. 10,2 hektar sahəni əhatə edən parkın ərazisində əvvəlcədən 5615 palıd, 1125 şam ağacı olub. Park salınmağa başlandıqdan sonra yüzlərlə ağac və bəzək kolu əkilib. Burada 30 min kubmetr həcmində torpaq işləri görülüb, yerli inşaat materialından istifadə edilməklə geniş tikinti-abadlıq işləri aparılıb. Parkın ətrafına dekorativ hasar çəkilib, 2 yerdə böyük giriş darvazaları tikilib, 14 fəvvarə, süni şəlalə yaradılıb.
Parkın mərkəzində Heydər Əliyevin abidəsi ucaldılıb, gənclərin asudə vaxtının səmərəli təşkili üçün istirahət mərkəzi inşa edilib.
Ərazidə geniş sahədə çəmənlik salınıb, müasir işıqlandırma sistemi quraşdırılıb. Parkın Tovuzçay istiqamətində genişləndirilməsi nəzərdə tutulub.
Prezident İlham Əliyev parkda aşıq musiqisini dinlədi, ona rayon ictimaiyyəti adından saz hədiyyə edilib.
Sonra prezident İlham Əliyev rayonda inşa olunan beşulduzlu mehmanxananın layihəsi ilə tanış oldu. Bildirildi ki, 2008-ci ildə inşasına başlanılan mehmanxana üçün Bozalqanlı kəndi ərazisində 5,2 hektar sahə ayrılmışdır. Beşmərtəbəli binada 72 nömrə, üzgüçülük hovuzu, sauna, türk hamamı, trenajor zalı və masaj otaqlarından ibarət idman-sağlamlıq mərkəzi olacaq. Tikintisi bu ilin mayında başa çatdırılması nəzərdə tutulan mehmanxananın etibarlı su təminatı üçün subartezian quyusu qazılıb.
Prezident İlham Əliyev tikinti ilə bağlı tövsiyə və tapşırıqlarını verib.