Sosial

Ana səhifə

Sosial

XI sinif üzrə mərkəzləşdirilmiş yoxlama imtahanlarının nəticələri açıqlanıb

16 fevral 2011 09:02 (UTC +04:00)

Bakı. İlhamə İsabalayeva - APA. Fevralın 15-də Təhsil Nazirliyinin internet saytının (www.edu.gov.az) imtahan bölməsində Bakı şəhəri üzrə tam orta təhsil səviyyəsi (XI sinif) üzrə 2010-2011-ci dərs ilinin mərkəzləşdirilmiş yoxlama imtahanlarının nəticələri yerləşdirilib. Təhsil Nazirliyindən APA-ya verilən məlumata görə, Bakı şəhəri üzrə IX siniflər üçün mərkəzləşdirilmiş yoxlama imtahanlarının nəticələri isə yaxın günlərdə bu bölmədə olacaq.

2010-2011-ci dərs ilinin mərkəzləşdirilmiş yoxlama imtahanları fevralın 12-13-də Bakı şəhəri üzrə ümumi orta təhsil və tam orta təhsil səviyyələri üzrə keçirilib. Nazirlikdən bildirilib ki, 26730 XI sinif şagirdi 72 mərkəzdə, 36085 IX sinif şagirdi isə 74 mərkəzdə yoxlama imtahanına cəlb olunub. Bakı şəhərində məskunlaşan məcburi köçkün rayonlarının şagirdləri də bu imtahanlarda iştirak ediblər.

İmtahan XI sinif şagirdləri üçün 3, IX sinif şagirdləri üçün isə 1 saat 30 dəqiqə davam edib.

2010-2011-ci dərs ilində keçirilən yoxlama imtahanlarında bir sıra yeniliklər tətbiq olunub. Belə ki, tam orta təhsil səviyyəsi üzrə yoxlama və buraxılış imtahanlarında ümumi sual sayı dəyişilməz olaraq 120 qalsa da, fənlər üzrə sual sayları dəyişilib. Ana dili və riyaziyyat fənləri üzrə sualların sayı 25-dən 21-ə endirilib, təbiət fənləri üzrə sualların sayı isə (kimya, biologiya, fizika, coğrafiya) 10-dan 12-yə qaldırılıb. Bundan əlavə, ilk dəfə şagirdlərə Təhsil Nazirliyi tərəfindən hazırlanmış xüsusi buraxılış vərəqələri verilib.

Onu da qeyd edək ki, 2010-2011-ci dərs ilində mərkəzləşdirilmiş qaydada keçiriləcək yoxlama və buraxılış imtahanlarında respublika üzrə iştirak edəcək 236710 şagirdin 137523 nəfəri IX, 94417 nəfəri XI sinif, 4770 nəfəri isə texniki peşə liseylərinin şagirdidir.

Fevralın 20-dən etibarən respublikamızın digər bölgələrində də yoxlama imtahanları keçiriləcək.

məktəb_imtahan