Sosial

Ana səhifə

Sosial

Əli Həsənov: “Azərbaycanda qaçqınlara və məcburi köçkünlər humanitar yardımların paylanmasında mövcud olan nöqsanlar tamamilə aradan qalxıb”

17 fevral 2011 12:04 (UTC +04:00)

APA-nın məlumatına görə, bu barədə jurnalistlərə açıqlamasında Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov bildirib.

Ə. Həsənov fikrini onunla əsaslandırıb ki, əvvəlki dövrlərdə yardımların paylanması, yemək xərclərində mənimsəmə məsələləri mətbuatda dəfələrlə işıqlandırılsa da, hazırda bu tip yazılara rast gəlinmir. Eyni zamanda məcburi köçkünlərin mənzillərə köçürülməsində nöqsanlara yol verilməsi ilə bağlı heç bir fakt yoxdur.

«Bizim komitə 10 ildən çoxdur ki, korrupsiyaya qarşı mübarizə aparır», - deyə Ə.Həsənov vurğulayıb.

«Qaçqınkom» sədri Dağlıq Qarabağ münaşqişəsinin həlli ilə məşğul olan beynəlxalq təşkilatların səylərinin heç bir nəticə vermədiyini də bəyan edib: «BMT, ATƏT, Avropa Şurası Parlament Assambleyası on illərdir qəbul etdiyi qətnamələrinin icrasını təmin etmirsə, o, kimə lazımdır? Sabah dövlətlərdə sual yaranacaq ki, ümumiyyətlə bu qurumlara üzv olmaq lazımdırmı? Əgər bu qurumların qararlarının icra mexanizmi yoxdursa, əgər bəzi dövlətlər bu qurumların qərarlarını saymırlarsa, onda bu qurum kimə lazımdır? Ermənistan nə dövlətdir ki, bu qurumların qərarını saymır? Bəs buna havadarları niyə belə imkan yaradır?»

Ə. Həsənov onu da əlavə edib ki, Azərbaycan da, Ermənistan da adıçəkilən təşkilatların üzvləridir: “Ermənistana qarşı sanksiya tətbiq etmirlər. Lakin Azərbaycan tərəfi hansısa qərarı icra etməyəndə isə bizə qarşı nə cür yazılar dərc edir, bəyanatlar verirlər, mütəmadi olaraq gəlib qərarların icrasını yoxlayırlar”.