Sosial

Ana səhifə

Sosial

Ekologiya və Təbii Sərvətlər Nazirliyi: Biz hansısa ağacın kəsilməsi ilə bağlı yalnız rəy və təklif verə bilərik

18 fevral 2011 11:46 (UTC +04:00)

Bakı. Ramil Məmmədli – APA. “Ekologiya və Təbii Sərvətlər Nazirliyi hansısa ağacın kəsilməsi ilə bağlı yalnız rəy və təklif verə bilər”. Bunu APA-nın sualını cavablandıran nazirliyin mətbuat xidmətinin rəhbəri İradə İbrahimova deyib. O bildirib ki, yıxılmış və yıxılmaqda olan ağacın kəsilməsi, həmçinin onun yerinə hansı ağacın əkilməsi Bakı şəhər İcra Hakimiyyətinin (BŞİH) Yaşıllaşdırma Təsərrüfat Birliyinin səlahiyyətindədir: “Yaşıllaşdırma Təsərrüfat Birliyinin nümayəndələrinin Ekologiya və Təbii Sərvətlər Nazirliyi Dövlət Ekspertiza İdarəsinin bu məsələdə məsuliyyət daşımasına dair mətbuata verdikləri açıqlamalar gülüncdür. Bu cür açıqlamalar məntiqə söykənmir və onların öz vəzifələrini, həmçinin nazirliyin Dövlət Ekspertiza İdarəsinin funksiyasını bilməməsindən irəli gəlir. Paytaxtdakı yaşıllıqlar və yaşıllaşdırma prosesi nazirliyin fəaliyyət istiqamətlərinə daxil deyil və biz ağacların əkilib-becərilməsinə cavabdehlik daşımırıq”.

İ. İbrahimova nazirliyə ağacların qəzalı vəziyyətdə olması barədə 2010-cu il ərzində ölkə əhalisindən 1286, Bakı sakinlərindən isə 1029 müraciət daxil olduğunu açıqlayıb. Nazirliyin ekspertləri müraciətlərə uyğun olaraq həmin ağacların kəsilib-kəsilməməsi ilə bağlı rəy verib. Verilmiş rəydə vətəndaşlara ağacın kəsilməsi və ya budanması üçün Bakı şəhər İcra Hakimiyyətinin Yaşıllaşdırma Təsərrüfat Birliyinə müraciət etmələri də tövsiyə olunub. İ. İbrahimovanın sözlərinə görə, nazirliyin rolu Nazirlər Kabinetinin 19 sentyabr 2005-ci il tarixli 173 saylı qərarının tələblərinə uyğun olaraq müraciət edildiyi halda yalnız müvafiq rəy və təkliflər bildirməkdir: “Lakin Nazirlər Kabinetinin qərarı qüvvəyə mindiyi vaxtdan bu günə qədər Yaşıllaşdırma Təsərrüfat Birliyi tərəfindən nazirliyə təhlükəli ağaclara rəy bildirilməsi barədə müraciət daxil olmayıb”.

ekologiya_ağac