Sosial

Ana səhifə

Sosial

Prokurorluq işçiləri üçün tikiləcək yaşayış binasının eskiz layihəsində insolyasiya normasının pozulması aşkarlanıb

21 fevral 2011 14:39 (UTC +04:00)

Bakı. Hafiz Heydərov-APA. “ Azərbaycan Prezidenti İlham Əliyevin 27 sentyabr 2008-ci il tarixli sərəncamı ilə təsdiq edilmiş "Prokurorluğun fəaliyyətinin müasirləşdirilməsinə dair 2009-2011-ci illər üçün Dövlət Proqramı"nda prokurorluq işçilərinin mənzilə olan ehtiyaclarının ödənilməsi və yaşayış şəraitinin yaxşılaşdırılması məqsədi ilə Bakı şəhərində yaşayış binalarının inşası nəzərdə tutulub. Bununla bağlı Bakı şəhər İcra Hakimiyyəti başçısının sərəncamı ilə Bakı şəhəri, Xətai rayonu, İ.Zülfüqarov və Sadıqcan küçələrinin kəsişdiyi 2942 A saylı məhəllədə 4 bloklu, 17 mərtəbəli, 208 mənzilli yaşayış binalarının tikintisi üçün 0,59 ha torpaq sahəsi Baş Prokurorluğun daimi istifadəsinə verilib”. APA-nın xəbərinə görə, bu barədə Respublika Baş Prokurorluğunun rəsmi saytında yerləşdirilmiş məlumatda bildirilib.

Məlumata görə, yaşayış binalarının kooperativ əsaslarla inşası istiqamətində zəruri tədbirlər həyata keçirilməklə prokurorluq işçilərinin əmlak pay haqlarını könüllü birləşdirmək yolu ilə "Qayğı" mənzil-tikinti kooperativi təsis edilib: “Qeyd edilən yaşayış bunalarının eskiz layihəsi Dövlət Şəhərsalma və Arxitektura Komitəsində baxılarkən, binanın 4-cü blokunun qonşuluğunda yerləşən 9 mərtəbəli yaşayış evindəki mənzillərin insolyasiya normasının (günəş işığının mənzillərə maneəsiz daxil olması) pozulmasına səbəb olması müəyyən edilib. Həmin səbəbə görə, eyni zamanda qeyd edilən 9 mərtəbəli yaşayış binasının sakinlərinin şikayətləri nəzərə alınaraq, binanın tam yeni layihəsi hazırlanır. Həmin layihə hazırlanaraq təsdiq olunduqdan sonra kooperativ tərəfindən açıq tender elan olunacaq və tenderdə qalib olan şirkət tərəfindən binanın inşasına başlanılacaq”.

Məlumatada bildirilib ki, prokurorluq işçiləri tərəfindən kooperativin üzvlüyündən azad olunması və ya ödənilmiş vəsaitin geri qaytarılması ilə əlaqədar Baş Prokurorluğun rəhbərliyinə, həmçinin kooperativə şikayət daxil olmayıb: “Kooperativin üzvləri tərəfindən ödənilmiş pul vəsaitləri tam məbləğdə kooperativə xidmət göstərən kredit təşkilatının bank hesabındadır”.

Qeyd edək ki, "Yeni Müsavat" qəzeti 20 fevral 2011-ci il sayında "Prokurorluğun 250 işçisinə "atıb"lar" sərlövhəli məqalədə Dövlət Proqramı çərçivəsində prokurorluq işçiləri üçün tikiləcək yaşayış binasının tikintisi ilə bağlı problem yarandığını yazıb.

Baş Prokurorluq məlumatında həmin informasiyanı təkzib edib, bunun həqiqətə uyğun olmadığı bildirilib.