Sosial

Ana səhifə

Sosial

Monqolustan və Türkmənistan Azərbaycanın sığorta-pensiya modelini öyrənmək istəyir

28 fevral 2011 08:21 (UTC +04:00)

Bakı - APA-Economics. Azərbaycanın sığorta-pensiya sistemində aparılan islahatlar və qurulan yeni modelin öyrənilməsi Dünya Bankı tərəfindən keçid dövrü ölkələrinə tövsiyə olunub.

Azərbaycan Dövlət Sosial Müdafiə Fondunun (DSMF) İctimaiyyətlə əlaqələr sektorundan “APA-Economics”ə verilən məlumata görə, bu tövsiyəyə uyğun olaraq Dünya Bankının layihələrinin tətbiq olunduğu keçid dövrü ölkələrinin müvafiq nümayəndə heyətlərinin Azərbaycanın sığorta-pensiya modelinin öyrənilməsi məqsədilə respublikamıza səfərləri planlaşdırılır. Artıq Monqolustan və Türkmənistanın sığorta-pensiya qurumları Azərbaycan təcrübəsini öyrənmək üçün Dövlət Sosial Müdafiə Fonduna (DSMF) rəsmi müraciət ediblər.

Monqolustanın Sosial Sığorta Fondu tərəfindən ünvanlanan məktubda müvafiq nümayəndə heyətinin DSMF ilə əməkdaşlıq etmək üçün Azərbaycana səfər etmək niyyətində olduğu bildirilib. “Bir çox informasiya mənbələrindən aldığımız məlumatlara görə, sizin ölkəniz bazar iqtisadiyyatının prinsiplərinə, müasir tələblərə cavab verən və ədalətlilik prinsipinə əsaslanan şəffaf və aydın fərdi sosial sığorta sistemi formalaşdırıb və bu sistem digər ölkələr üçün modelə çevrilib. Regionda digər ölkələri geridə qoymuş Azərbaycanın müvəffəqiyyətli pensiya islahatı barədə biz məlumatlıyıq və məmnuniyyət hissi ilə sizin təcrübənizdən yararlanmaq istərdik” - deyə Monqolustanın Sosial Sığorta Fondunun Baş direktorunun məktubunda vurğulanır.

Türkmənistanın nümayəndə heyəti də Azərbaycanla sığorta-pensiya islahatları üzrə əməkdaşlıq istiqamətində razılıq əldə etmək üçün ölkəmizə səfərə gəlmək niyyətində olduğunu bildiriblər.

Əfqanıstanın nümayəndə heyəti isə artıq bir dəfə Azərbaycanda səfərdə olub. Dünya Bankının Əfqanıstan üzrə layihəsi çərçivəsində baş tutan səfər zamanı DSMF-də olan nümayəndə heyəti ölkəmizdə sığorta-pensiya sistemində həyata keçirilən və beynəlxalq etimad qazanan islahatlarla tanış ediliblər. Bu səfərin nəticələrinə əsasən, iki ölkənin müvafiq qurumları arasında gələcək əməkdaşlığı nəzərdə tutan saziş layihəsinin imzalanması nəzərdə tutulur.

Xatırladaq ki, Dünya Bankı missiyasının rəsmi məlumatında Azərbaycanın sığorta-pensiya sisteminin beynəlxalq model olaraq çıxış etdiyi və Fondun beynəlxalq sosial təminat aləmində nüfuzlu bir quruma çevrildiyi əks etdirilmişdir.

Azərbaycanın sığorta-pensiya modelinin nüfuzlu beynəlxalq təşkilatlar və maliyyə institutları tərəfindən yüksək qiymətləndirilməsinin nəticəsi kimi hələ 2004-cü ildə ölkəmiz Beynəlxalq Sosial Təminat Assosiasiyasının büro üzvü, 2007-ci ildə isə inkişaf etmiş Avropa ölkələri ilə bir sırada Assosiasiyanın Avropa Şəbəkəsinin Rəhbər Komitəsinin üzvü seçilib. Ölkəmiz Assosiasiya çərçivəsində yüksək səviyyədə müvafiq qərarların qəbul edilməsində xüsusi rola malikdir.