Sosial

Ana səhifə

Sosial

Təhsil Nazirliyinin şöbə müdiri: “Müəllif və ekspertlər TQDK-nın dərsliklərdəki səhvlərlə bağlı qeydlərinin əksəriyyətini yanlış sayırlar”

28 fevral 2011 13:04 (UTC +04:00)

Bakı. İlhamə İsabalayeva – APA. “Tələbə Qəbulu üzrə Dövlət Komissiyasının dərsliklərdə səhvlərin olması barədə verdiyi rəylə bağlı müəllif və ekspertlərlə bu günlərdə danışmışıq. Onlar həmin qeydlərin əksəriyyətinin yanlış olduğu fikrindədirlər. Mən bunu Məleykə xanımın özünə, TQDK-da biologiya sahəsi üzrə mütəxəssis Tariyel müəllimə də demişəm”. Bu sözləri APA-ya açıqlamasında Təhsil Nazirliyinin dərslik və nəşriyyat şöbəsinin müdiri Faiq Şahbazlı TQDK sədri Məleykə Abbaszadənin biologiya və zoologiya dərsliklərində səhvlərin olması barədə söylədiyi fikrə münasibət bildirərkən deyib.

Dərsliklərlə bağlı nöqsanların olduğunu inkar etməyən nazirlik rəsmisi xüsusilə rus dilinə tərcümə ilə bağlı problemli məsələlərin olduğunu söyləyib. O qeyd edib ki, təhsil naziri Misir Mərdanov da dərsliklərin rus dilinə tərcüməsi məsələsinə diqqətin artırılması barədə tapşırıq verib: “Amma dərslikdə çox ciddi qüsurlar yoxdur. Mən bunu Məleykə Abbaszadəyə də demişəm. TQDK-da biologiya sahəsi üzrə mütəxəssis Tariyel müəllim əvvəlki illərdə də belə şeylər edib, o, 5-6 il əvvəlki, indi istifadə edilməyən köhnə dərsliklərdən misal gətirir”.

F. Şahbazlı “Abituriyent” jurnalında dərsliklərdəki səhvlərin “dərslikdəki səhvlər və onların düzəlişi” adı altında dərc edilməsini də qəbul etmir: “Belə şey qoymazlar, bu nə başlıqdır? Bu, etik cəhətdən doğru deyil. Əvvəla, dərslikləri çap edən nəşriyyatlar və onların müəllifləri var. Onlarla razılaşmadan düzəliş etmək mümkün deyil. Çünki müəlliflik hüququ var”.

Digər dərsliklərdəki səhvlərin olub-olmamasına gəldikdə, F.Şahbazlı deyib ki, adı qeyd edilmiş vəsaitlərdən başqa, onlara digər dərsliklərdə nöqsanların olması ilə bağlı heç bir rəy və təklif daxil olmayıb: “Əlbəttə, dərsliklərə münasibət birmənalı deyil. Müəlliflərin fikri ilə razılaşmayanlar da olur, müəlliflər də onların dərsliyi haqqında deyilənlərlə razılaşmaya bilər. Dərsliyə doqma kimi yanaşmaq olmaz. Amma hər halda biz tərəfdarıyıq ki, dərslikdə nöqsanlar olmamalı, elmi səhvlərə yol verilməməli, dərslərin dili şagirdlərin yaşına, səviyyəsinə uyğun yazılmalıdır. Bütün bunların üzərində çalışırıq. Amma təbii ki, bütün hallarda müəyyən problemlər həmişə olub, indi də var, gələcəkdə də olması gözlənilir. Biz isə çalışırıq ki, bunları aradan qaldıraq”.

F. Şahbazlı hazırda TQDK ilə sıx əməkdaşlıq etdiklərini də açıqlayıb: “Artıq iki ildir ki, ayrı-ayrı dərsliklərin müzakirəsində iştirak edirik. Amma elə məsələlər var ki, biz onları birgə həll etməliyik. Biz səhvlərin hansısa jurnalda dərc olunması xatirinə yox, ümumi səhvlərin aradan qaldırılması üçün iş aparmalıyıq”.

TQDK-nın VII - VIII siniflər üçün “Zoologiya” dərsliyi və onların rus dilinə tərcüməsi ilə bağlı mənfi rəyinin də olduğunu deyən F. Şahbazlının sözlərinə görə, artıq bu fənn üzrə yeni dərsliyin hazırlanması üçün tender elanı verilib. Növbəti tədris ilindən tamamilə yeni “Zoologiya” dərsliyi istifadəyə veriləcək.

TQDK _ dərsliklər