Sosial

Ana səhifə

Sosial

Xocalı faciəsinin 19-cu ildönümü ilə əlaqədar İordaniyada və Mərakeşdə silsilə tədbirlər keçirilib

28 fevral 2011 13:35 (UTC +04:00)

Bakı-APA. Xocalı faciəsinin 19-cu ildönümü ilə əlaqədar «Xocalıya Ədalət!» kampaniyası çərçivəsində Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyası İordaniyada və Mərakeşdə bu ölkələrdəki Azərbaycan səfirlikləri ilə birgə silsilə tədbirlər keçirib. Dövlət Komissiyasından APA-ya verilən məlumata görə, tədbirlərdə İordaniyada akkreditə olunmuş bir sıra xarici ölkələrin diplomatik nümayəndəliklərinin rəhbərləri və diplomatları, yerli kütləvi informasiya vasitələrinin təmsilçiləri, həmçinin ölkəmizin dostları olan xeyli sayda xarici vətəndaşlar iştirak ediblər.
Tədbiri giriş sözü ilə açan səfir Elman Araslı ermənilər tərəfindən Azərbaycana qarşı törədilmiş terrorçuluq əməlləri və insanlığa qarşı cinayət olan Xocalı faciəsi barədə tədbir iştirakçılarına ətraflı məlumat verib və «Xocalıya Ədalət!» kampaniyası çərçivəsində il ərzində silsilə tədbirlərin davam etdiriləcəyini bildirib. Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi Şahin Sayılov çıxış edərək tədbir iştirakçılarına faktlar əsasında ermənilərin Azərbaycan xalqına qarşı həyata keçirdiyi soyqırım, etnik təmizləmə, vandalizm, əsir, girov və itkinlərlə bağlı həqiqətləri çatdırıb. Tədbirlərin iştirakçılarına Xocalı faciəsini və erməni terrorçuluğunun fəsadlarını əks etdirən sənədli film, kitablar, şəkillər və digər faktoloji materiallar təqdim olunub. Tədbirlər İordaniyanın «əl-Ğad», «əl-Rəy» «əl-Arab» qəzetləri və «Əmira nyus» internet səhifəsində geniş işıqlandırılıb.

Xocalı faciəsinin ildönümü ilə əlaqədar Azərbaycanın Mərakeşdəki səfirliyi, Mərakeş-Azərbaycan Dostluq Cəmiyyəti və Əsir və itkin düşmüş, girov götürülmüş vətəndaşlarla əlaqədar Dövlət Komissiyası birlikdə anım mərasimi təşkil ediblər.
Tədbirdə Mərakeşin dövlət rəsmiləri, Mərakeş-Azərbaycan Dostluq Cəmiyyətinin üzvləri, İSESCO-nun, akkreditə olunmuş diplomatik korpusun, KİV və yerli ictimaiyyətin nümayəndələri iştirak edib.
Azərbaycanın Mərakeşdəki səfiri Sabir Ağabəyov Azərbaycan xalqının azadlıq mübarizəsi, müstəqillik yolunda qarşılaşdığı çətinliklər, erməni terrorçuları tərəfindən törədilmiş Xocalı qətliamının mahiyyətindən və Heydər Əliyevin hakimiyyətə qayıdışından sonra bu qanlı faciəyə siyasi-hüquqi qiymət verilməsindən danışıb.
Dövlət Komissiyasının katibi Şahin Sayılov Ermənistanın Azərbaycana qarşı etnik təmizləmə və soyqırım siyasəti, təcavüz nəticəsində ölkəmizə dəymiş maddi-mənəvi zərər, mədəniyyət abidələrinin dağıdılması, beynəlxalq hüquq normalarına zidd olaraq əsir və girov götürülmüş Azərbaycan vətəndaşlarına qarşı törədilmiş cinayətlər haqqında geniş məlumat verib.

Tədbir iştirakçılarına Xocalı faciəsini və erməni terrorçuluğunun fəsadlarını əks etdirən kitablar, kompakt disklər, fotoşəkillər və digər əyani vəsaitlər təqdim edilmiş, həmçinin “Erməni terroru” adlı sənədli film nümayiş olunub.

Xocalı _ 19