Sosial

Ana səhifə

Sosial

Azərbaycan paytaxtında fransız məktəbinin tikintisi ilə əlaqədar niyyət bəyannaməsi imzalanıb

02 mart 2011 08:32 (UTC +04:00)

APA-nın “AzərTac” dövlət agentliyinə istinadən verdiyi məlumata görə, Heydər Əliyev Fondunda imzalanma mərasimindən əvvəl keçirilmiş görüşdə Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva fransız məktəbinin Azərbaycanda təhsil sahəsindəki inkişaf prosesinə müsbət təsir göstərəcəyindən ümidvar olduğunu deyib.

Azərbaycanın birinci xanımı Azərbaycan-Fransa münasibətlərini yüksək qiymətləndirib, bu məktəbin açılışını ölkələrimiz arasında bütün sahələrdə uğurla inkişaf edən əməkdaşlıqda növbəti addım kimi səciyyələndirib: “Ümidvaram ki, yaxın gələcəkdə fransız məktəbi ölkəmizdə fəaliyyətə başlayacaq və bu, Azərbaycanın təhsilinə öz müsbət təsirini göstərəcək. Bu gün Azərbaycanda təhsilə olan diqqət, Azərbaycan üçün təhsilin inkişafı prioritet sahədir. Əlbəttə belə bir məktəbin ölkəmizdə fəaliyyəti bu prosesə güclü təkan verəcək”.

Fransanın Azərbaycandakı səfiri Qabriel Keller göstərilən dəstəyə görə M. Əliyevaya təşəkkürünü bildirib, bu əlamətdar hadisənin Azərbaycan-Fransa münasibətləri üçün çox əhəmiyyətli olduğunu deyib.

Azərbaycanda təhsilə olan dövlət qayğısından danışan təhsil naziri Misir Mərdanov Heydər Əliyev Fondunun təhsilin inkişafı sahəsində gördüyü işləri, həyata keçirdiyi layihələri xüsusi vurğulayıb. Nazir bildirib ki, Heydər Əliyev Fondu ən geniş layihələrini təhsil sahəsində reallaşdırır. İndiyədək Fondun təşəbbüsü ilə 300-dən çox müasir tipli təhsil müəssisəsi tikilərək istifadəyə verilib.

Azərbaycanın iqtisadi uğurları və əlverişli investisiya mühiti barədə danışan ARDNŞ prezidenti Rövnəq Abdullayev xarici investorların ölkəmizə marağının getdikcə artdığını vurğulayıb. O deyib ki, belə bir tədris müəssisəsi Azərbaycana çalışmaq üçün gələn fransızdilli vətəndaşların övladları üçün gözəl töhfədir.

Sonra Heydər Əliyev Fondunun prezidenti Mehriban xanım Əliyeva, Fransanın Azərbaycandakı səfiri Qabriel Keller, Azərbaycan Dövlət Neft Şirkətinin prezidenti Rövnəq Abdullayev, təhsil naziri Misir Mərdanov Bakıda fransız məktəbinin tikintisinə dair niyyət bəyannaməsini imzalayıblar.

Azərbaycanda müvəqqəti və daimi yaşayan fransızdilli əcnəbi vətəndaşların və Azərbaycan vətəndaşlarının fransız dilində təhsil almasına imkan verən məktəbin yaradılması hər iki ölkənin maraqlarına cavab verir. Fransanın milli tədris proqramına uyğun təhsil verəcək fransız məktəbinin yaradılması iki ölkə arasında təhsil, mədəniyyət və dilçilik sahəsində əməkdaşlığın mühüm amilinə çevriləcək.

Bəyannaməyə əsasən, fransız məktəbinin tədris planı uşaq bağçasından başlayaraq, 12 illik ümumi təhsil müəssisəsində tətbiq edilən klassik fransız modelinə uyğun olacaq.

Tədris proqramı Fransa milli təhsil sisteminin tələblərinə müvafiq olaraq fransız dilində aparılacaq. Məktəbin Fransa Milli Təhsil Nazirliyinin standartlarına və tələblərinə cavab verən attestatı Fransa dövləti tərəfindən tanınacaq. Məktəbin məzunları öz seçimlərinə uyğun olaraq təhsillərini Fransanın istənilən ali təhsil müəssisəsində davam etdirmək imkanı qazanacaq. Yeni təhsil ocağının yaradılması gələcəkdə yüksək səviyyəli peşəkar mütəxəssislərin yetişməsinə imkan verməklə yanaşı, iki ölkə arasında iqtisadi əməkdaşlıq imkanlarını daha da genişləndirəcək.

M. Əliyeva gələcəkdə də belə səmərəli əməkdaşlığın davam edəcəyinə ümidvar olduğunu deyib.

fransız_məktəb