Sosial

Ana səhifə

Sosial

Azərbaycanda “Özünədəstək” ünvanlı sosial yardım proqramı layihəsinin sınaqdan keçirilməsinə başlanılıb

02 mart 2011 14:25 (UTC +04:00)

Bakı. İlhamə İsabalayeva - APA-Economics. Azərbaycan Əmək və Əhalinin Sosial Müdafiəsi Nazirliyi (ƏƏSMN) respublika ərazisində ilk dəfə olaraq Tovuz rayonunun Vahidli kəndində bu gündən “Özünədəstək” ünvanlı sosial yardım proqramı layihəsinin sınaqdan keçirilməsinə başlayıb.

Nazirliyin yoxsulluq problemləri və sosial yardım siyasəti şöbəsinin müdiri Natiq Qasımov APA-ya bildirib ki, layihədə iştirak üçün Vahidli kəndinin seçilməsinin əsas səbəbi bu kəndin Ermənistanla həmsərhəd yerləşməsidir.

Onun sözlərinə görə, layihə çərçivəsində dövlət büdcəsindən ayrılmış vəsait hesabına ailəyə təyin edilmiş ünvanlı sosial yardımın təxminən bir illik məbləği miqdarında birdəfəlik yardım veriləcək.

N.Qasımov deyib ki, 12 ay ərzində 3 ayda bir dəfə olmaqla ailələrdə layihənin monitorinqi həyata keçiriləcək. Monitorinqin keçirilməsində kənd ərazisində yaradılacaq Şura üzvləri və digər təşkilatların nümayəndələri iştirak edə bilər. Monitorinqin nəticələrinin qiymətləndirilməsi zamanı layihədə iştirak edən ailələrin mövcud vəziyyətinə uyğun layihədən kənarlaşdırılmasına və yaxud yeni il üçün əlavə dəstəyin verilməsinə qərar veriləcək.

Monitorinqin nəticələrinə görə, 1 ailə proqramda 1 il iştirak edəcək. Zərurət yaranarsa, bu müddət 6 və ya 12 ay uzadıla bilər.

Yeni layihədə iştirak edəcək ailələr kənd ərazisində yaradılacaq Şura tərəfindən Əhalinin Sosial Müdafiəsi Mərkəzinə təqdim edilmiş meyarlar əsasında seçiləcək. Şuranın tərkibi kənd icra nümayəndəliyinin, bələdiyyənin nümayəndələri, ağsaqqallar və seçiləcək fəaliyyət növündən asılı olaraq mütəxəssislərdən ibarət olacaq. Şuranın işində müşahidəçi qismində ƏSMM-in, QHT-lərin, KİV-in, həmkarlar təşkilatlarının və digər təşkilatların nümayəndələri də iştirak edə bilər. Şura ailənin planını ƏSMM-ə təqdim edəcək. Nazirliyin komissiyası müzakirələrdən sonra müvafiq qərar qəbul edəcək.

“Özünədəstək” proqramında ilkin olaraq ünvanlı sosial yardım alan ailələr iştirak edəcək. Seçim zamanı uşaqlı ailələrə üstünlük veriləcək: “Proqramda iştirak etmək üçün ailələrin bəzi əmlaklarının olması da tələb olunur. Məsələn, mal-qara saxlamaq üçün tövlə, tərəvəz becərmək üçün münasib torpaq sahəsi və s. Ailə bu proqramda iştirak etmək istəyirsə, seçilmiş fəaliyyət növü ilə məşğul olmaq üçün əmək qabiliyyətli üzvünün olması vacibdir. Ailənin kredit borcu olarsa, proqram çərçivəsində aldığı pulu ora yönləndirə bilər”.

N.Qasımovun sözlərinə görə, Vahidli kəndində bu layihəyə 15 ailənin cəlbi nəzərdə tutulur. Apreldən isə daha üç pilot rayonda - İsmayıllı, Masallı və Qubada bu layihənin sınaqdan keçirilməsinə başlanacaq. Bu rayonların hər birindən 20 ailə olmaqla ümumilikdə 60 ailə layihədə iştirak edəcək.