Sosial

Ana səhifə

Sosial

Dövlət Torpaq və Xəritəçəkmə Komitəsində “Qaynar xətt” yaradılıb

03 mart 2011 12:42 (UTC +04:00)

Bakı. İlhamə İsabalayeva – APA. Dövlət Torpaq və Xəritəçəkmə Komitəsi şəffaflığı təmin etmək üçün “Qaynar xətt” yaradıb. APA-nın məlumatına görə, bunu jurnalistlərə açıqlamasında Dövlət Torpaq və Xəritəçəkmə Komitəsinin sədri Qərib Məmmədov deyib. O bildirib ki, komitə tərəfindən korrupsiya və rüşvətxorluğa qarşı mübarizə həmişə aparılıb, amma kimisə korrupsiya faktına görə günahlandıra bilməzlər: “Biz konkret kiminsə yaxasından tutaraq onun korrupsioner olduğunu deyə bilmərik. Belə formada mümkün deyil. Korrupsiyanı Baş Prokurorluq yanında Korrupsiyaya Qarşı Mübarizə İdarəsi müəyyən edir. Bizim vəzifəmiz korrupsiyaya aparılan yolları qapatmaqdır”.

DTXK sədri əlavə edib ki, “Bələdiyyə torpaqlarının idarə olunması haqqında” qanunun 9-cu maddəsində bələdiyyənin torpaqları birbaşa və ya bilavasitə hərrac-müsabiqə yolu ilə sata bilməsi göstərilirdi: “Bələdiyyələr isə əksər hallarda “birbaşa” sözündən istifadə edərək torpaqların satılması üçün hansısa formada danışıqlar aparırdı, bunu da heç kim bilmirdi və sonra sərəncam verilirdi. Hətta elə hallar olub ki, bu vəsait bələdiyyənin büdcəsinə də ödənilməyib. Şəffaflığın artırılması üçün biz ölkə prezidentinə, Nazirlər Kabinetinə müraciət etdik. Nəticədə “Bələdiyyə torpaqlarının idarə olunması haqqında” qanundan birbaşa sözünü çıxartdırdıq. Artıq bələdiyyə torpaqları yalnız hərrac və müsabiqə yolu ilə satılır”.

Q. Məmmədovun sözlərinə görə, bələdiyyələr tərəfindən 2009-2010-cu illərdə 3 minə qədər torpaq alqı-satqısı aparılıb və bu proseslə bağlı komitəyə yalnız 2 əsassız şikayət daxil olub: “Bunun özü bir daha rüşvət faktının olub-olmadığını göstərir”.

Komitə rəhbəri onu da qeyd edib ki, şəffaflığı təmin etmək üçün ölkə prezidentinin sərəncamı ilə yaradılan hərrac-müsabiqə komissiyalarının 5 nəfər ibarət olan üzvünün 3 nəfəri kənardan, yalnız 2 nəfəri komitədən təyin edilib.

Q. Məmmədov hazırda komitənin balansında bir qarış da torpağın olmadığını vurğulayıb: “Komitənin torpağa sərəncam vermək səlahiyyəti yoxdur. Bizim yalnız nəzarət funksiyamız var”.

qərib_məmmədov