Sosial

Ana səhifə

Sosial

Azərbaycanda işləyən şəxslər gələcək pensiyalarının təyinatı üçün sığorta haqlarının hesablanmasına özləri nəzarət edəcəklər

04 mart 2011 12:35 (UTC +04:00)

Bakı. İlhamə İsabalayeva - APA-Economics. Azərbaycan Dövlət Sosial Müdafiə Fondu sığortaolunanların fərdi hesablarında toplanmış sosial sığorta haqlarının məbləği barədə müasir məlumatlandırma sisteminin yaradır.

Fondun ictimaiyyətlə əlaqələr sektorunun müdiri Elman Babayev “APA-Economics”ə bildirib ki, bu işlər ölkə prezidenti cənab İlham Əliyevin 2008-ci ildə təsdiqlədiyi “2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı”na uyğun həyata keçirilir. Proqrama əsasən, bu məlumatlandırma bazası 2013-2015-ci illər ərzində istifadəyə verilməlidir.

Şəffaflığın daha da artırılmasını təmin etmək üçün 2011-2012-ci illərdə sığortaolunanların fərdi məlumatlarının qorunması mexanizmlərinin gücləndirilməsi, 2013-2015-ci illər ərzində sığortaolunanların fərdi hesabları ilə bağlı müraciətləri operativ cavablandıracaq müştəri xidmətləri şəbəkəsinin yaradılması nəzərdə tutulur.

E.Babayev deyib ki, DSMF bu tədbirləri nəzərdə tutulmuş vaxtdan tez həyata keçirməyi qarşısına məqsəd qoyub. Artıq sığortaolunanların fərdi hesablarında toplanmış sosial sığorta haqlarının məbləği barədə müasir məlumatlandırma sistemini özündə ehtiva edən proqram təminatı hazırlanıb. Hazırda onun üzərində sınaq tədbirləri həyata keçirilməkdədir.

Fond rəsmisinin sözlərinə görə, gələcəkdə ödənilmiş sığorta haqları barədə məlumat bazasının DSMF-nin internet saytına yerləşdirilməsi nəzərdə tutulur. Bu isə o deməkdir ki, hər bir sığortaolunan öz sosial sığorta şəhadətnaməsinin nömrəsini həmin məlumat bazasına daxil etməklə istənilən vaxt 01.01.2006-cı il tarixindən, yəni yeni sistem fəaliyyətə başlayandan sonra toplanmış və illər üzrə indeksasiya edilmiş sığorta haqlarının məbləği barədə məlumat ala biləcək. Belə məlumat əsasında hər bir sığortaolunan şəxs istənilən an öz gələcək pensiyasının təmin olunmuş məbləğini müəyyənləşdirə və bu proseslərə nəzarət edə biləcək.

E.Babayev deyib ki, sığortaolunanların özlərinin pensiya kapitalına nəzarət etmək imkanını əldə etməsi sistemdə şəffaflığın daha da artmasına imkan verəcək. Belə ki, bu proses həm işəgötürənlər üzərində ictimai nəzarətin təşkilinə, həm də yaxın gələcəkdə avtomatlaşdırılmış pensiya təyinatına imkan verəcək. Başqa sözlə, hər bir işləyən özü üçün sosial sığorta haqlarının vaxtında və tam məbləğdə köçürülməsinə nəzarət etmək və gələcəkdə etibarlı pensiya təminatı əldə etmək imkanına malik olacaq.