Sosial

Ana səhifə

Sosial

15 mart - Ümumdünya istehlakçı hüquqlarının müdafiəsi günüdür

15 mart 2011 09:31 (UTC +04:00)

Bakı - APA-Economics. 15 mart - Ümumdünya istehlakçı hüquqlarının müdafiəsi günüdür. “APA-Economics”in xəbərinə görə, bu barədə Standartlaşdırma, Metrologiya və Patent üzrə Dövlət Komitəsinin mətbuat xidməti açıqlama yayıb.

Açıqlamada bildirilir ki, komitənin tabeçiliyində fəaliyyət göstərən Azərbaycan Standartlar İnstitutu tərəfindən 2010-cu il ərzində 37, o cümlədən ümumi təmayüllü 10, neft və neft məhsulları və onların təyini metodlarına aid 8, maşınqayırma üzrə 4, ət və süd emalı məhsullarına aid 11, yüngül sənaye məhsullarına aid 4 normativ sənəd hazırlanıb. Ümumilikdə keçən il beynəlxalq, Avropa Birliyinin və regional standartlar əsasında hazırlanmış 162 milli standart dövlət qeydiyyatına alınıb.

Standartların tələblərinə, sertifikatlaşdırma qaydalarına, metroloji qayda və normalara riayət edilməsini yoxlamaq məqsədilə Komitənin ərazi dövlət nəzarəti idarələri tərəfindən 2010-cu il ərzində 2146 təsərrüfat obyektində (subyektində) dövlət nəzarəti aparılıb. Dövlət nəzarəti qaydasında aparılmış yoxlamaların 1481-i istehsal sahəsində, o cümlədən 929-u ərzaq məhsullarının istehsalı, 552-si qeyri-ərzaq məhsullarının istehsalı sahəsində aparılıb. Dövlət nəzarəti qaydasında aparılmış yoxlamalar zamanı 344 müəssisədə nöqsanlar aşkar edilərək iradnamə və tələbnamə verilib, 147 müəssisə barəsində İnzibati xəta haqqında protokol tərtib edilərək barələrində müvafiq inzibati qərarlar qəbul edilib.

İstehlakçıların hüquqlarının müdafiəsi ilə bağlı Komitəyə 2010-cu il ərzində 77 müraciət daxil olub ki, bu müraciətlərdən 55-i müsbət həll olunub, 10 müraciət əsassız sayılıb, 9 müraciətlə bağlı müvafiq izahat verilib və 3 müraciət Komitənin səlahiyyətinə aid olmadığına görə baxılması üçün aidiyyəti üzrə göndərilib.