Sosial

Ana səhifə

Sosial

Xəzərin Su Bioresursları Komissiyasının daimi üzvü: “Xəzərdə nərəcinsli balıqların ovuna qadağa qoyulması məsələsi bu ilin ilk yarısında həll olunacaq”

16 mart 2011 10:20 (UTC +04:00)

Bu barədə APA-ya Ekologiya və Təbii Sərvətlər Nazirliyinin (ETSN) Su Hövzələrində Bioloji Resurslarının Artırılması və Mühafizəsi Departamentinin baş məsləhətçisi, Xəzərin Su Bioresursları Komissiyasının daimi üzvü Tariyel Məmmədli məlumat verib.

Onun sözlərinə görə, artıq Almatıda beş ölkənin iştirakı ilə ilkin görüş keçirilib və konsepsiya hazırlanıb: “İndi bu konsepsiyanın bəndləri üzrə razılığa gəlinməlidir. Bu yaxınlarda ölkələrin görüşü keçirildikdən sonra bu məsələyə Xəzərin Su Bioresursları Komissiyasında bir daha baxılacaq. Çox güman ki, bu ilin ilk yarısında bu məsələ həll olunacaq. Moratoriumun tətbiqi üçün bir neçə sənəd və saziş imzalanmalıdır. Bunlar da belə tez mümkün ola bilməz”.

T. Məmmədli deyib ki, moratoriumun qoyulmasına artıq bütün Xəzəryanı ölkələr razılıq verib: “Amma bu moratoriumu qəbul etməkdən ötrü sənəd olmalıdır. Bunun əsasında bilinməlidir ki, dövlətlərarası səviyyədə bu məsələyə necə və kim nəzarət edəcək, mühafizə ilə kim, balıqların artırılması ilə kim məşğul olacaq? Eyni zamanda, balıqartırma işləri necə aparılacaq? Bu istiqamətdə koordinasiya işlərinin necə görüləcəyi də müəyyənləşdirilməlidir. Bundan əlavə, hələlik Xəzərin statusu olmadığı üçün hər ölkə dənizin 10 mil ərazisini mühafizə edir. Bəs, onda açıq dənizi kim mühafizə edəcək və nərəcinsli balıqların süni şəkildə artırılması üçün koordinasiya işlərini kim görəcək? Bunlar da müəyyənləşdirilməlidir. Hətta Xəzərin Su Bioresursları Komissiyası 20 ildir ki, mövcud olmasına baxmayaraq, onun dövlətlərarası statusu yoxdur. Buna görə də komissiyaya dövlətlərarası status verilməlidir ki, bu mexanizm olsun”.