Sosial

Ana səhifə

Sosial

Şirvana səyyar həkim briqadası ezam olunub

16 mart 2011 13:00 (UTC +04:00)

Şirvan. Əlibəy Zeynallı - APA. Şirvana dayaq hərəkət funksiyasını itirmiş vətəndaşlara protez-ortopedik məmulatlarla təmin olunması üçün səyyar həkim briqadası ezam olunub.

APA-nın Mil-Muğan bürosunun məlumatına görə, bu gün Əmək və Əhalinin Sosial Müdafiəsi Nazirliyinin (ƏƏSMN) Bakı Protez-Ortopedik Bərpa Mərkəzinin səyyar həkim briqadası tərəfindən müxtəlif səbəblərdən əlil olmuş 25 nəfər müxtəlif dərəcəli əlili Şirvan Regional Əlillərin Bərpası və Reabilitasiya Mərkəzində qəbul edib və müayinəsini keçirib. Fərdi qaydada müraciət etmiş əlillərdən ölçülər götürülüb, müayinə olunub, hazır protez-ortopedik məmulatlar isə əlillərə verilib.

Tədbirdə iştirak edən Bakı Protez-Ortopedik Bərpa Mərkəzinin direktoru İlham Bağırov bildirib ki, vətəndaşlara göstərilən bütün xidmətlər pulsuzdur. Bu xidmətlər vaxtaşırı ƏƏSMN-in müvafiq strukturları tərəfindən regionlarda həyata keçirilir.

ƏƏSMN-in Tibbi-sosial ekspertizanın təşkili və əlillərin sosial reabilitasiyası şöbəsinin müdir müavini Saday Abdullayev isə deyib ki, Şirvana ezam olunmaqda əsas məqsəd əhaliyə, əlil və tənha şəxslərə yerlərdə xidməti təşkil etməkdir: “Nazirliyin müvafiq əmri ilə respublikanın bütün bölgələrinə Tibbi-sosial ekspertizanın təşkili və əlillərin sosial reabilitasiyası şöbəsinin həkim və ekspertləri vaxtaşırı ezam olunur, nazirliyə daxil olmuş ərizə və şikayətlər araşdırılaraq yerlərdə müzakirə olunur və bunun nəticəsində də tədbirlər görülür. Son günlər nazirliyə 300-dən artıq ərizə və şikayət daxil olub. Daxil olan bütün ərizə və şikayətlər araşdırılıb. Onların içərisində əsaslı şikayətlər də, əsassız olanları da var. Hazırda Milli Məclisdə nazirliyin təqdim etdiyi sosial xidmətin təşkili sahəsində qanun layihəsinin müzakirəsi aparılır. Layihədə çoxsaylı xidmət sahələrinin artırılması nəzərdə tutulur. Əvvəllər tənha və kimsəsiz vətəndaşlara xidmətlər göstərilirdi. Hazırda qanunun müzakirəsində əlil uşaqlara, tam imkansız ailələrə, əlil şəxslərə baxan ailə üzvlərinə sosial yardımlar verilməsi nəzərdə tutulub. Eyni zamanda nazirlik tərəfindən Tibbi-sosial ekspertizanın təşkili və əlillərin sosial reabilitasiyasının yaxşılaşdırılması üçün meyarlar əsasnamələrdə yenidən hazırlanaraq Nazirlər Kabinetinə baxılmaq üçün göndərilib. Məqsəd bu sahədə xidmətin keyfiyyətini yaxşılaşdırılması və neqativ halların azalmasıdır”.