Sosial

Ana səhifə

Sosial

Bakı Dövlət Universitetində boş olan dekan vəzifələrinin tutulması üçün müsabiqə elan edilib

30 mart 2011 15:38 (UTC +04:00)

Bakı. İlhamə İsabalayeva-APA. Nazirlər Kabinetinin «Dövlət büdcəsindən maliyyələşdirilən ali təhsil müəssisələrində çalışan işçilərin yeni vəzifə maaşlarının və vəzifə maaşlarına əlavələrin təsdiq edilməsi haqqında» 12 sentyabr 2008-ci il tarixli, 210 nömrəli qərarının qəbul olunması ilə bağlı ali təhsil müəssisələrində fakültə dekanı, kafedra müdiri və dekan müavini vəzifələrinin tutulması qaydasında müvafiq dəyişikliklər edilməsi nəzərdə tutulub.

Bakı Dövlət Universitetinin Mətbuat və İnformasiya şöbəsinin rəhbəri Pərvanə İbrahimova APA-ya bildirib ki, bu baxımdan həmin vəzifələrin tutulması ilə bağlı müsabiqənin keçirilməsi Təhsil Nazirliyi tərəfindən müvəqqəti olaraq dayandırılıb və onların səlahiyyət müddəti seçki keçirilənədək uzadılıb. Həmin qaydalar təhsil naziri Misir Mərdanovun bu il martın 9-da verdiyi əmrlə təsdiq olunduğundan onun icrası ilə əlaqədar olaraq, digər ali məktəblər kimi, Bakı Dövlət Universiteti tərəfindən də boş olan dekan vəzifələrini tutmaq üçün müsabiqə elan edilib.

BDU-nun 17 fakültəsindən 15-i - Hüquq, Beynəlxalq münasibətlər və beynəlxalq hüquq, Filologiya, Tarix, Şərqşünaslıq, Sosial elmlər və psixologiya, Kitabxanaçılıq - informasiya, İlahiyyat, Mexanika-riyaziyyat, Fizika, Kimya, Biologiya, Geologiya, Coğrafiya, Ekologiya və torpaqşünaslıq fakültələri müsabiqədə iştirak edəcək. Digər iki fakültənin – Jurnalistika, Tətbiqi riyaziyyat və kibernetika fakültəsinin dekanlarının səlahiyyət müddətləri başa çatdıqdan sonra həmin fakültələr üzrə də müsabiqə elan ediləcək. Müsabiqədə kafedra müdiri vəzifəsinə müvafiq kafedranın, dekan vəzifəsinə isə fakültənin profilinə uyğun yüksək peşə-ixtisas hazırlığına, elmi ad və dərəcələrə, lazımi elmi-pedaqoji, idarəetmə təcrübəsinə, yüksək mənəvi keyfiyyətlərə malik Azərbaycan vətəndaşları, həmçinin müvafiq qanunvericiliyin tələbləri gözlənilməklə xarici ölkə vətəndaşları da iştirak edə bilərlər. Təyinolunmanın şəffaf və obyektiv aparılmasını təmin etmək məqsədilə komissiyanın tərkibinin müəyyənləşdirilməsi istiqamətində isə iş aparılır. Növbəti mərhələdə kafedra müdiri vəzifəsini tutmaq üçün də müsabiqə elan ediləcək.