Sosial

Ana səhifə

Sosial

Milli Arxiv İdarəsində kollegiya iclası keçirilib

08 aprel 2011 09:49 (UTC +04:00)

Bakı. Kəmalə Quliyeva – APA. Milli Arxiv İdarəsində ötən ilin yekunları və 2011-ci ildə qarşıda duran vəzifələrlə bağlı kollegiya iclası keçirilib. APA-nın məlumatına görə, kollegiyada çıxış edən idarənin təşkilat-metodika şöbəsinin müdiri Kamal Ağayev bildirib ki, ötən il 230 min arxiv işinin və 70 minədək kitab və dövri nəşr məhsullarının saxlanma şəraiti yaxşılaşdırılıb.

Ölkə prezidentinin göstərişi ilə Dövlət Kino-Foto Sənədləri Arxivi üçün 40 min saxlama vahidi tutumu olan əlavə binanın tikintisinə başlanılıb. Ötən il ölkə arxivlərinə 47 min idarəçilik işi, 22 mindən artıq şəxsi mənşəli sənəd, 400-dən artıq elmi-texniki, 700-ə yaxın kino, 2100-ə yaxın foto, 1000-ə yaxın fotovideo sənədləri qəbul edilib.

K. Ağayev bildirib ki, ötən il dövlət arxivlərinin sənədlərindən vətəndaşların, idarə və təşkilatların ərizə və sorğularının icrası məqsədilə geniş istifadə olunub. Vətəndaşların, idarə və təşkilatların 25700 ərizə və sorğusu icra edilib. İl ərzində arxivlər XIX-XX əsrlər üzrə Azərbaycan tarixini əhatə edən 7 sənədlər külliyyatı üzərində iş aparıb. Bu il isə arxivlərdə saxlanılan 100 min vərəqin bərpası, 72 min işin cildlənməsi və tikilməsi, 68 min işin qutulaşdırılması nəzərdə tutulur. 80 min saxlama vahidinin dövlət mühafizəsinə qəbulu və onların dövlət qeydiyyatına alınması planlaşdırılır.