Sosial

Ana səhifə

Sosial

Azərbaycanda Ümumdünya Hemofiliya Günü ilə əlaqədar tədbir keçirilib

15 aprel 2011 11:27 (UTC +04:00)

Bakı. İlhamə İsabalayeva - APA. Bu gün Bakıda Hemofiliyalı Xəstələrin Respublika Assosiasiyası (HXRA) 17 aprel Ümumdünya Hemofiliya Günü ilə əlaqədar hemofiyalı xəstələrin problemlərinə həsr olunmuş tədbir keçirilib. APA-nın məlumatına görə, HXRA-nın prezidenti Gülnarə Hüseynova deyib ki, bu tarix hazırda dünyanın 116 ölkəsində, o cümlədən Azərbaycanda da qeyd olunur. HXRA prezidentinin sözlərinə görə, hazırda hemofiliyadan dünyada təxminən 400 min nəfər əziyyət çəkir. G. Hüseynova əlavə edib ki, bu xəstəlik insan qanında laxtalanma faktorlarının çatışmazlığı nəticəsində əmələ gəlir. Xəstəlik anadan əsasən oğlan uşaqlarına irsən ötürülür. Hemofiliyalı xəstələr mütəmadi olaraq laxtalanma faktorları qəbul etmədikdə, dəfələrlə baş verən şiddətli qanaxmalar, oynaqlara və yumşaq toxumalara qansızmalar onların uşaq və gənc yaşlarında şikəst olmasına, bəzi hallarda isə ölümünə səbəb olur.

Respublika Elmi-Praktik Hemofiliya Mərkəzinin (REPHM) rəhbəri Elmira Qədimovanın sözlərinə görə, bu gün xəstələrin siyahısında olan mindən çox uşaq, gənc və böyük artıq keyfiyyətli müalicəyə başlayıblar: “Son 5 il ərzində uşaqlar arasında orta məktəbləri çox yaxşı bitirərək ali məktəblərə daxil olanlar da var. Bu, onu göstərir ki, yaxşı həkim, yaxşı dərmanlar varsa, yaxşı təhsil almaq da mümkündür. Bu müalicə valideynlərin problemlərini də azaldır”.
Bütün xəstələrin evdə dərman ehtiyatlarının olduğunu vurğulayan E. Qədimova xəstələrə ilk yardımı valideynlərinin göstərdiyini deyib: “Respublikaya kifayət qədər dərman ehtiyatları gəlir. Bizim xəstələrin sayı az olsa da, dərmanları çox bahadır. Yaxşı olardı ki, ağır xəstələrimiz profilaktik müalicə alsınlar. Növbəti beşillik proqrama biz profilaktik müalicənin vacibliyini də daxil etmişik”.
E. Qədimova bildirib ki, 1973-cü ildən Mirqasımov adına Respublika Klinik Xəstəxanasının nəzdində yaradılmış Elmi-Praktik Hemofiliya Mərkəzində həmin xəstələr müayinə və müalicə olunurlar: ”2006-cı ilə qədər hemofiliyalı xəstələrin müalicəsində yalnız qan və dondurulmuş plazmadan istifadə olunurdu. Artıq “Hemofiliya və talassemiya irsi qan xəstəlikləri üzrə Dövlət Proqramı”na uyğun olaraq, faktor preparatları Səhiyyə Nazirliyi tərəfindən mütəmadi olaraq xaricdən ölkəmizə gətirilir və mərkəz onlarla tam təmin olunur. Həmin dərmanlar Elmi-Praktik Mərkəzin həkimləri tərəfindən xəstələrə tamamilə pulsuz, dövlət hesabına verilir. Amma bu xəstələrə qan çox lazımdır. Ona görə də bu gün donorlara çox ehtiyacımız var”.

hemofiliya