Sosial

Ana səhifə

Sosial

Gənclər arasında “Mədəni İrsimiz-Tarixi Dəyərimiz” mövzusunda foto-müsabiqə keçirilir

21 aprel 2011 07:17 (UTC +04:00)

Bakı – APA. Azərbaycanın Gənclər və İdman Nazirliyi aprel və may ayları ərzində 16-21 yaş arası gənclər üçün «Mədəni İrsimiz-Tarixi Dəyərimiz» mövzusunda foto-müsabiqəyə start verir. Nazirliyin mətbuat xidmətindən APA-ya verilən məlumata görə, müsabiqəyə qatılmaq üçün gənclər tərəfindən Azərbaycanın zəngin mədəni irsini, mənəvi-əxlaqi dəyərlərini, tarixi məkanlarını özündə əks etdirən fotoşəkillər qəbul olunur.

Müsabiqənin keçirilməsində əsas məqsəd Azərbaycanın mədəni irsinin, dəyərlərinin dünya mədəniyyətinin tərkib hissəsi kimi təbliğ olunması, gənclərdə Vətənə məhəbbət hisslərinin aşılanmasıdır. Bununla yanaşı, Avropa Şurasının təşəbbüsü ilə dünyanın əksər ölkələrində keçirilən «Beynəlxalq Mədəni İrs Fotoqrafiya Təcrübəsi» layihəsinin Azərbaycanda da baş tutması əsas amillərdən biridir.

Bu müsabiqə eyni zamanda Azərbaycanda “Turizm ili”nin elan olunması ilə əlaqədar olan tədbirlər çərçivəsində gerçəkləşdirilir.

Müsabiqənin nəticəsi olaraq 4 nəfər qalib pul ilə mükafatlandırılacaq . 1 yer 300 manat, 2 yer 200 manat, 3 yer isə hər birinə 100 manat olmaq şərti ilə 2 nəfərə veriləcək.

Eyni zamanda qaliblər Gənclər və İdman Nazirliyi və Avropa Şurası tərəfindən təsis edilən fəxri diplomlar ilə də təltif olunacaqlar. Qalib gəlmiş fotoşəkillər «Beynəlxalq Mədəni İrs Fotoqrafiya Təcrübəsi» layihəsinin ümumi kataloqunda nəşr etdiriləcək.

Müsabiqənin hər bir iştirakçısı fotoşəkilin adının qeyd olunması şərti ilə yalnız 10 şəkil (cd ya dvd formatında) təqdim edə bilər. Fotoşəkillərlə yanaşı müəllif haqqında informasiya (adı, soyadı, təvəllüd) və şəxsiyyət vəsiqənin surəti də əlavə edilməlidir .

Fotoşəkillər 3 may 2011 il tarixinədək Gənclər və İdman Nazirliyində qəbul olunur.