Sosial

Ana səhifə

Sosial

Bakıda əmək miqrantlarının problemləri müzakirə olunur

27 aprel 2011 08:45 (UTC +04:00)

Bakı. Əli Əhmədov – APA-Economics. Bu gün Bakıda «Miqrasiya problemləri və çağırışlar: Həmkarlar İttifaqlarının rolu» mövzusunda beynəlxalq konfrans işə başlayıb.

«APA-Economics»in məlumatına görə, müxtəlif ölkələrin həmkarlar təşkilatları və beynəlxalq qurumların, o cümlədən Beynəlxalq Əmək Təşkilatının nümayəndələrinin qatıldığı tədbirdə miqrasiya proseslərinin tənzimlənməsi, xarici ölkələrdə çalışan miqrantların hüquqlarının qorunması, onların həmkarlar təşkilatlarında birləşməsi, insan alveri və məcburi əməyin qarşısının alınması sahəsində əməkdaşlıq və s. məsələlər müzakirə olunur.

Azərbaycan Həmkarlar İttifaqları Konfederasiyasının sədri Səttar Mehbalıyevin sözlərinə görə, hazırda Azərbaycanda yaşayan xaricilərin 25%-i əmək miqrantıdır. Ötən ilin yekunlarına görə, ölkədə rəsmi qeydiyyata alınmış 92 ölkədən gəlmiş 10,2 min əmək miqrantı fəaliyyət göstərib. Xaricilər Azərbaycanda neft sektoru, nəqliyyat və tikinti komplekslərində çalışırlar. Onlar əsasən Türkiyə, Gürcüstan, Rusiya, İran, Hindistan, Çin, Böyük Britaniya və Şimali İrlandiya, Ukrayna və s. ölkələrdən gələnlərdir. Azərbaycandan xaricdə çalışanların sayı isə 400 min nəfərə yaxındır. Miqrantların 83%-i Rusiyada, 5%-i Ukrayna, qalanları isə Qazaxıstan, Belarus, Gürcüstan və digər ölkələrdədir.

Qeyd edək ki, konfrans iki gün davam edəcək.