Sosial

Ana səhifə

Sosial

Xaricdə işləyən Azərbaycan vətəndaşlarının ilk həmkarlar təşkilatı yaradılır

27 aprel 2011 09:06 (UTC +04:00)

«APA-Economics»in məlumatına görə, bu barədə Azərbaycan Həmkarlar İttifaqları Konfederasiyasının (AHİK) sədri Səttar Mehbalıyev məlumat verib.

Onun sözlərinə görə, AHİK-lə Rusiyanın Müstəqil Həmkarlar İttifaqları Federasiyası arasında bağlanmış müqaviləyə əsasən Rusiyanın Sverdlovsk vilayətinin Yekaterinburq şəhərində işləyən azərbaycanlıların həmkarlar təşkilatı yaradılacaq: «Məqsəd orada yaşayan azərbaycanlı miqrantların sosial və əmək hüquqlarının qorunmasıdır».

Müqaviləyə əsasən, həmin təşkilat pulsuz ofislə təmin olunacaq. Öz növbəsində Azərbaycan tərəfi bu təşkilata yardım olaraq ilkin dövrlərdə qurumun işçilərinə hər ay 1000-1200 manat maaş verəcək: «Onlar işlərini qurub maliyyə mənbələrini təmin edənə qədər biz onlara kömək edəcəyik».

Qeyd edək ki, belə müqavilə və ona dəstək forması Qafqaz ölkələrində ilk dəfədir. S.Mehbalıyevin sözlərinə görə, Rusiya həmkarlar ittifaqlarının Rusiya hökuməti ilə bağladığı Baş Kollektiv Saziş yeni təşkilata da şamil olunacaq: «Yəni onların da hüquqları Rusiya vətəndaşları kimi qorunacaq».

Bundan başqa, həmkarlar təşkilatlarının yaranması sayəsində azərbaycanlı miqrantlar öz hüquqlarını daha yaxşı qorumaqla yanaşı, əlavə hüquqlar da qazanacaq, seçib-seçilə biləcəklər: “Onlar seçkilərdə, o cümlədən Dövlət Dumasına seçkilərdə iştirak edə biləcəklər”.

S.Mehbalıyev qeyd edib ki, təşkilatın yaradılması ilk addımdır, onun sonrakı fəaliyyəti burda çalışanların işi nə qədər düzgün qura bilməsindən asılıdır: “Digər tərəfdən, belə təşkilatların yaradılması insan alverinin və məcburi əməyin qarşısının alınmasına kömək edəcək. Bu işlər nəticəsində Azərbaycan vətəndaşı aldadılaraq xaricə aparılsa, orda həmin ölkənin həmkarlar təşkilatına müraciət etməklə onların hesabına hüquqi yardım ala biləcək. Məsələn, vətəndaşın pulu olmasa, həmin təşkilat onu geri qayıtmaq pulu ilə təmin edəcək».

AHİK rəhbərinin sözlərinə görə, belə müqavilələr azərbaycanlıların sıx yaşadığı Rusiyanın digər vilayətləri, o cümlədən Tümen və Sankt-Peterburqla, eləcə də digər ölkələrdə - Ukrayna, Qazaxıstan və Türkiyə ilə bağlanacaq.