Sosial

Ana səhifə

Sosial

Azərbaycanda ünvanlı sosial yardımların verilməsi sistemi dəyişdirilir

28 aprel 2011 13:52 (UTC +04:00)

Nazirliyin yoxsulluq problemləri və sosial yardım siyasəti şöbəsinin aparıcı məsləhətçisi Babək Hüseynov APA-ya bildirib ki, bu rayonların hər birindən 30 ailə olmaqla, ümumilikdə 90 ailənin proqrama cəlb edilməsi nəzərdə tutulur. Təxminən 5-6 aydan sonra Nazirlik layihədə iştirak edəcək bu ailələrin əldə edəcəyi nəticələri nəzərdən keçirəcək. Nəticələrdən asılı olaraq, ünvanlı sosial yardımla bağlı qanunvericiliyə dəyişikliklərin edilməsi nəzərdə tutulur. Gələn ildən isə artıq yeni dəyişikliklərin tətbiqi gözlənilir.

Nazirlik rəsmisinin sözlərinə görə, qanunvericiliyə edilən dəyişiklik ünvanlı sosial yardımın aztəminatlı ailələrə iki formada – birdəfəlik və aylıq verilməsi planlaşdırılır. Hazırda əhaliyə bu yardımlar 1 il ərzində aybaay verilir. Amma dəyişikliklər təsdiqlənərsə, artıq birdəfəlik ünvanlı sosial yardım tətbiq ediləcək: «Yəni, ailəyə əvvəlcədən böyük məbləğdə sosial yardım veriləcək. Bu məbləğin təxminən 1500 manatadək olması gözlənilir. Bu yardımın da verilməsində əsas məqsəd ailələrin fərdi əmək fəaliyyəti ilə məşğul olmaları və şəxsi yardımçı təsərrüfatlarının inkişafı yolu ilə yoxsulluq həddindən çıxarılmasıdır. Bu layihə vasitəsilə ailələrin məşğulluğu da təmin olunacaq. Onlar özləri yaratdıqları iş yerlərində işləyə biləcəklər. Bəzən bu yardımı mikrokredit kimi qiymətləndirirlər. Amma bu, heç də belə deyil. Bu vəsait dövlət tərəfindən vətəndaşlara əvəzsiz verilir. Vətəndaşların öhdəliyi ondan ibarət olur ki, onlar biznes planı təqdim etsin və orada fəaliyyət göstərəcəkləri sahəni göstərsinlər. Ailələr vəsaiti düzgün xərcləməlidirlər ki, sonra müsbət nəticələr əldə etsinlər. Digər yenilik isə odur ki, bu ailələrin seçilməsinə ictimai şuralar kömək edəcək».

B.Hüseynov deyib ki, qanunvericiliyə ediləcək dəyişikliklərdə ünvanlı sosial yardımın alınması üçün tələb olunan sənədlərin sayının azaldılması və müddətin dəyişdirilməsi ilə bağlı təkliflərin əksini tapacağı gözlənilmir. İlkin müraciətlər üçün sənədlərin sayı kifayət qədər azaldılıb, bundan aşağı ola bilməz. Hazırda 9 adda sənəd tələb olunur. Amma hesablamalara görə, ilkin müraciət zamanı bir ailədən orta hesabla 5-6 adda sənəd tələb olunur: «Bu da normaldır. Bir çox ölkələrdə yardım 3 və 6 ay müddətinə verilir. Çox az ölkələrdə yardım 1 il müddətinə verilir. Azərbaycan da bu ölkələrin sırasındadır».

Nazirlik rəsmisinin bildirdiyinə görə, hazırda ölkədə 122 minə yaxın ailə ünvanlı sosial yardım alır. Artıq aprel ayından başlayaraq, ailələrə yardımların ödənişi üçün Beynəlxalq Bank və Kapital Bank tərəfindən plastik kartlar paylanılır.