Sosial

Ana səhifə

Sosial

Son beş ildə Azərbaycan idmançıları beynəlxalq yarışlarda 2 583 medal qazanıb

05 iyul 2011 11:07 (UTC +04:00)

Bakı. Vahab Rzayev - APA. Son beş ildə Azərbaycan idmançıları tərəfindən müxtəlif beynəlxalq yarışlarda ümumilikdə 2 583, o cümlədən 927 qızıl, 709 gümüş və 947 bürünc medal qazanılıb. APA-nın xəbərinə görə, bu barədə Dövlət Statistika Komitəsinin məlumatında deyilir.

Ötən il beynəlxalq turnirlərdə 206-sı Olimpiya idman növləri üzrə olmaqla 675 medal əldə edilib ki, onların da 85-i qadınlara məxsusdur. Medalların 182-si dünya çempionatlarında, 97-si Avropa çempionatlarında, 83-ü dünya kuboku yarışlarında qazanılıb. Gənc idmançılar Yeniyetmələrin I Yay Olimpiya Oyunlarında böyük uğurla çıxış edib və 204 ölkə arasında 11-ci yeri tutublar.

Cari ilin birinci yarısında idmançılarımız mühüm nailiyyətlər əldə edib və beynəlxalq yarışlarda 68-i Olimpiya idman növləri üzrə olmaqla 103 medal qazanıb ki, onların da 24-ü qızıl, 30-u gümüş, 49-u bürüncdür.

Komitənin məlumatında deyilir ki, idmanın maddi-texniki bazasının möhkəmləndirilməsi məqsədilə 2010-cu ildə ölkədə dörd Olimpiya İdman Kompleksi, Horadiz şəhərində müasir İdman Mərkəzi istifadəyə verilib, Mingəçevirdə Beynəlxalq Avarçəkmə Mərkəzi yenidən bərpa edilib. Cari ilin iyun ayında tikintisinə ötən il start verilən və 5 500 kv. metr ərazini əhatə edən Bakı Tennis Akademiyasının Mərkəzi Kortu istifadəyə verilib. Bundan əlavə, mövcud idman qurğuları, stadionlar və digər idman meydançaları təmir edilmiş və günün tələblərinə uyğun olaraq yenidən qurulub. Cari ilin əvvəlinə ölkədə idman qurğularının sayı 9,5 minə çatıb, bədən tərbiyəsi və idmanla məşğul olanların sayı 1 649,8 min nəfər təşkil edib.