Sosial

Ana səhifə

Sosial

Bu ilin ilk yarısında Azərbaycanda 93 nəfərdə “Hepatit C” virusu aşkarlanıb

26 iyul 2011 10:28 (UTC +04:00)

Bakı. Sevil Zeynalqızı-APA. Ümumdünya Səhiyyə Təşkilatı (ÜST) 28 iyun tarixini “Dünya Hepatit Günü” elan edib. ÜST-nın Azərbaycandakı nümayəndəliyindən APA-ya verilən məlumata görə, Hepatit C (HCV) hər il dünyada 350 min insanın ölümünə səbəb olur. Təşkilatın hesablamalarına görə, hər il dünyada bu xəstəliyə yoluxmuş 130-170 milyon insan qaraciyər serrozu, qaraciyər xərçənci kimi xəstəliklərə yaxalanma riski ilə yaşayır.

Hepatit C bu günə qədər tapılmış altı hepatit viruslarından (A, B, C, D, E və G) biridir. HCV bu virusların içərisində ən təhlükəlisi hesab edilir. Virus qaraciyərdə və qanda aşkarlanır. HCV qaraciyərə gizlicə zərbə vura bilən bir virusdur və onunla yoluxan insanların çoxunda ilk zamanlar heç bir şikayət olmur.

Zaman keçdikcə Hepatit C virusu tədricən qaraciyər xərcənginə, qaraciyər çatışmazlığına və ya serroza gətirib çıxara bilər. Xəstəliyin sonrakı gedişi qaraciyərin liflərinin dağılması – qaraciyər serrozu ilə nəticələnir. Hepatit C virusu qan vasitəsilə yayılır. C hepatitinə qarşı heç bir vaksin yoxdur. Amma infeksiyanın simptomları tibbi baxımdan idarə edilə bilər və pasientlərin proporsiyası anti–virus dərmanlarının uzun kursu ilə virusdan təmizlənilə bilər.

Əhali arasında bu infeksiyaya yoluxmanın sayına görə, ilk üçlükdə Misir, Pakistan və Çin yer alır.

Azərbaycanın baş epidemioloqu İbadulla Ağayev APA-ya son illər Azərbaycanda bu xəstəliklə bağlı artımın olmadığını bildirib: “Hepatit C yoluxucu xəstəlikdir. Belə xəstəliklər həmişə var. Amma hazırda Azərbaycanda bununla bağlı artım yoxdur, stabillikdir”. İ. Agayevin sözlərinə görə, xəstəlikdən qorunma hər bir insanın öz üzərinə düşür: “Səhiyyə Nazirliyinin tədbirlər planına uyğun olaraq ölkədə xəstəliyin aşkarlandığı ərazilərdə tədbirlər həyata keçirilir. Nazirlikdə qeydiyyata düşən bütün xəstələr nəzarətdə saxlanılır və onlar mütəmadi olaraq müayinə və müalicə edilirlər”.

Respublika Gigiyena və Epidemiologiya Mərkəzinin Epidemioloji şöbəsinin müdiri Emin Babayev APA-ya bildirib ki, bu ilin altı ayı ərzində Azərbaycanda Hepatit C virusuna yoluxma ilə bağlı 93 hadisə qeydə alınıb: “Bu, ötən ilin müvafiq dövrü ilə müqayisədə 25,6 faiz azdır. 2010-cu ilin 6 ayı ərzində ölkədə 125 yoluxma halı qeydə alınıb”. E. Babayevin dediyinə görə, Bakı şəhəri üzrə isə bu ilin altı ayı ərzində 31 belə hadisə qeydə alınıb: “Ötən ilin müvafiq dövründə bu rəqəm 42 olub. Bu da 26,2 faiz azalma deməkdir”.