Sosial

Ana səhifə

Sosial

ETSN Milli Hidrometeorologiya Departamenti anomal isti hava şəraiti ilə əlaqədar operativ iş rejiminə keçib

30 iyul 2011 10:27 (UTC +04:00)

Saat 11:00-dan 17:00-dək ənənəvi olan 3 saatlıq müşahidələrlə yanaşı, hər saatdan bir maksimal temperatur üzərində müşahidələr aparılır. Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyevin APA-ya verdiyi məlumata görə, Bakı və Abşeron yarımadasında müşahidə olunan faktiki temperatur haqqında hər saatdan bir nazirliyin rəsmi saytında məlumatlar yerləşdiriləcək. Bu gün saat 11-ə olan məlumata görə, Bakı stansiyasında havanın maksimal temperaturu 34,5, Neft Daşlarında 33,5, Sumqayıtda 35,3, Maştağada 31,7, Pirallahı stansiyasında isə 30,2 dərəcə olub. Saat 12-yə olan məlumata görə isə, havanın maksimal temperaturu Bakı stansiyasında 34,8, Neft Daşlarında 33,9 , Sumqayıtda 36,2, Maştağada 33,2, Pirallahı stansiyasında isə 30,5 dərəcə olub.
Qeyd edək ki, avqust ayının 3-dək ölkə ərazisində kəskin isti hava şəraiti davam edəcək. Maksimal temperaturun Bakıda və Abşeron yarımadasında 38-40 dərəcəyə, yarımadanın bəzi yerlərində 42 dərəcəyədək yüksələcəyi, Aran rayonlarında və Naxçıvan MR-da 38-42 dərəcə, bəzi yerlərdə 44 dərəcə, dağlıq rayonlarda 35-38 dərəcəyədək yüksələcəyi gözlənilir.