Sosial

Ana səhifə

Sosial

“Ətraf mühit texnologiyaları və yaşıl iqtisadiyyat imkanları” mövzusunda konfrans keçirilib

03 noyabr 2011 09:34 (UTC +04:00)

APA-nın məlumatına görə, konfransın açılışında çıxış edən ekologiya və təbii sərvətlər nazirinin müavini Novruz Quliyev bildirib ki, tədbirdə Azərbaycanda “yaşıl” iqtisadiyyata keçid şəraitində ekoloji perspektivlər, müasir texnologiyalar və sair məsələlər ətrafında müzakirələr aparılacaq.

Konfransda iştirak edən təhsil nazirinin müavini Qulu Novruzov ekologiya ilə bağlı problemlərin dünyanın bütün ölkələrində qlobal problem olduğunu deyib: “Bu problemlərin tamamilə həlli mümkün deyil. Amma bu istiqamətdə optimal şərait yaratmaq üçün dövlət proqramları həyata keçirilir, bu sahəyə investisiyalar yatırılır”. Ekoloji təhsildən danışan Q. Novruzov Təhsil Nazirliyinin bu sahədə Ekologiya və Təbii Sərvətlər Nazirliyi ilə birgə iş apardığını söyləyib: “Azərbaycanda hələ də insanlarımızın ekologiya ilə münasibətləri istənilən səviyyədə deyil. Amma bu sahədə insanların maarifləndirilməsi, dövlətin ekologiya sahəsində həyata keçirdiyi siyasət öz bəhrəsini verəcək”.

Sənaye və Energetika Nazirliyinin Alternativ və Bərpa Olunan Enerji Mənbələri üzrə Dövlət Agentliyinin direktoru Akim Bədəlov Azərbaycanın alternativ enerji mənbələri haqqında məlumat verib. O qeyd edib ki, Qobustan rayonunda yaradılan xüsusi poliqonda dünyada ilk dəfə enerjini avtonom istehsal edən şəbəkə qurulub: “Artıq BMT-nin, Avropa İttifaqının mütəxəssisləri həmin əraziyə təcrübəyə gəlirlər”.

Fövqəladə Hallar Nazirliyinin Xəzər hövzə qəza-xilasetmə xidmətinin şöbə rəisi Nazim Ağayev isə neft hasilatı və nəqli zamanı baş verən neft dağılmalarının ləğvindən danışıb. O, bu sahədə istifadə edilən avadanlıqların təqdimatını keçirib.