Sosial

Ana səhifə

Sosial

Bakıda “Diabet və onun yaranma səbəblərinə qarşı xəbərdarlıq” adlı tədbir keçirilib

12 noyabr 2011 14:49 (UTC +04:00)

Bakı. Pərvin Abbasov - APA. Bu gün “Park Bulvar”da Azərbaycan Diabet Liqasının (ADL) təşkilatçılığı ilə “Diabet və onun yaranma səbəblərinə qarşı xəbərdarlıq” adlı tədbir təşkil olunub.

APA-nın xəbərinə görə, çıxış edən ADL-in sədri Yeganə Sultanova tədbirin 14 noyabr - Ümumdünya Diabet Günü münasibətilə keçirildiyini bildirib. O deyib ki, noyabrın 14-də Respublika Endokrinoloji Mərkəzi (REM) ilə birgə Salyan rayonunda Diabet Məktəbinin açılışı olacaq.

Tədbir iştirakçıları könüllü olaraq özündə diabet riskinin nə dərəcədə ola biləcəyini və bu riski necə azalda biləcəyini öyrənmək imkanı da qazanıb. REM-in tibb işçiləri tədbirə gəlmiş iştirakçıları test üsulundan, antropometrik ölçülərdən və qlükometr vasitəsilə müayinədən sonra nə dərəcədə risk qrupuna daxil olduğunuzu müəyyən ediblər. Bunun davamı olaraq yüksək risk qrupundan olanlara isə daha dərin müayinə məqsədi ilə REM-də pulsuz müayinəyə göndəriş verilib.

Qeyd edək ki, bəşəriyyətin diqqətini şəkərli diabetlə bağlı problemlərə yönəltmək məqsədilə 1991-ci ildən Ümumdünya Səhiyyə Təşkilatının (ÜST) və Beynəlxalq Diabet Federasiyasının (BDF) tövsiyələrinə görə 14 noyabr tarixi Ümumdünya Diabet Günü kimi qeyd edilir. 2007-ci ildən isə 14 noyabr Birləşmiş Millətlər Təşkilatının günü elan edilərək, bütün üzv dövlətlərdə xüsusi qeyd edilir. Ümumdünya Diabet Gününün emblemi olan mavi dairə şəkərli diabet ətrafında hamının birləşməsini simvolizə edir.