Sosial

Ana səhifə

Sosial

Azərbaycanda vəkillik institutunun inkişafı mövzusunda beynəlxalq konfrans keçirilir

16 noyabr 2011 10:05 (UTC +04:00)

Bakı. Ramil Məmmədli – APA. Azərbaycan Milli Elmlər Akademiyasının İnsan Hüquqları İnstitutu, ATƏT-in Bakı ofisi və qurumun Demokratik Təsisatlar və İnsan Hüquqları Bürosunun təşkilatçılığı ilə “Azərbaycanda vəkillik institutunun daha da inkişaf etdirilməsi və məhkəməyə müraciət etmək imkanlarının səmərəliliyinin artırılması” mövzusunda beynəlxalq konfrans başlayıb. APA-nın məlumatına görə, konfransı giriş sözü ilə açan AMEA İnsan Hüquqları İnstitutunun direktoru Aytən Mustafayeva deyib ki, Azərbaycan qanunvericiliyi təkmilləşib və formalaşıb, lakin cəmiyyət inkişaf etdikcə tələblər də dəyişir: “Vəkillik institutunun daha uğurlu və güclü olması üçün bu məsələyə diqqəti cəlb etməyi məqbul saydıq”.

Azərbaycan Prezident Administrasiyasının Hüquq-mühafizə orqanları ilə iş şöbəsinin baş müşaviri Otari Qvaladze bildirib ki, Azərbaycan dövləti məhkəmə-hüquq sahəsində zəruri islahatlar aparmaqla yanaşı, bu istiqamətdə addımları davam etdirməkdədir: “Bu gün Azərbaycanda ədalət mühakiməsi sistemi formalaşıb. Məhkəmə sistemində zəruri islahatlar artırılıb, o cümlədən yeni məhkəmələr yaradılıb. Vəkillik institutunun inkişaf etdirilməsi üçün vəkillərin özləri də aktiv olmalıdır. Həmçinin vəkillərin sayı artırılmalı və təcrübə kursları mütəmadi keçirilməlidir”.

Ədliyyə nazirinin müavini Toğrul Musayev çıxışında məhkəmə-hüquq islahatları haqqında danışıb. Onun sözlərinə görə, vəkillik institutunun müstəqilliyinin qorunması üçün əhəmiyyətli işlər davam etdirilməkdədir. Nazir müavini bu istiqamətdə qanunvericiliyin, eləcə də Vəkillər Kollegiyasının maddi-texniki bazasının təkmilləşdirilməsi istiqamətdə işlər görüldüyünü söyləyib.

ATƏT-in Bakı ofisinin rəhbəri Koray Targay bəyan edib ki, təmsil etdiyi qurum Azərbaycanda vəkillərin fəaliyyətini daim dəstəkləyir: “Azərbaycanda məhkəmə-hüquq sahəsində aparılan islahatlar diqqəti cəlb edir. Bölgələrdə yeni məhkəmələrin açılması da təqdirəlayiqdir”. Səfir Azərbaycandakı vəkillərin Avropadakı həmkarları ilə təcrübə mübadiləsi aparması məqsədilə birgə təlim və təcrübə mübadilələrinin həyata keçiriləcəyini deyib.

ATƏT-in Demokratik Təsisatlar və İnsan Hüquqları Bürosunun demokratikləşmə şöbəsinin müdiri Tomas Vennen vəkillik institutunun inkişafının əhəmiyyətini vurğulayaraq Azərbaycanın bu sahədə müstəqilliyin təmin olunmasına dair öhdəliyi olduğunu diqqətə çatdırıb. T. Vennen qeyd edib ki, azərbaycanlı vəkillərin beynəlxalq təcrübədən bəhrələnməsi önəmlidir.

Azərbaycan Vəkillər Kollegiyası Rəyasət Heyətinin sədri Azər Tağıyev isə çıxışında bildirib ki, artıq Azərbaycanda vəkillik institutunun formalaşması və inkişafı üçün qanunvericilik mövcuddur. O, bölgələrdə çalışan vəkillərin iş şəraitinin yaxşılaşdırılması məqsədilə bir sıra təkliflərlə çıxış edib.

Konfrans yerli və beynəlxalq ekspertlərin çıxışları ilə davam etdirilib. Noyabrın 17-də konfrans “Ədalətli məhkəmə araşdırmasının təmin edilməsində vəkillərin rolu” mövzusunda seminarın keçirilməsindən sonra işini yekunlaşdıracaq.