Sosial

Ana səhifə

Sosial

Budapeştdə V Ümumdünya Elm Forumu keçirilib

21 noyabr 2011 09:57 (UTC +04:00)

Bakı – APA. Budapeştdə keçirilən V Ümumdünya Elm Forumu öz işini başa çatdırıb. Azərbaycanın Macarıstandakı səfirliyindən APA-ya verilən məlumata görə, dünya alimlərinin beynəlxalq toplantısında başlıca mövzu müasir elmin üzləşdiyi problemlərin təhlili və müzakirəsi olub.

Forumun açılış mərasimində Macarıstanın baş naziri Viktor Orban, BMT baş katibi Pan Gi Mun, UNESCO-nun baş katibi İrina Bokova, Macarıstan EA-nın prezidenti Yozef Palinkas, Avropa Komissiyasının Birləşmiş Tədqiqatlar Mərkəzinin direktoru Dominik Ristori və digərləri çıxış edib.

Yüzə yaxın ölkədən gəlmiş alimlər üç gün ərzində dünyada baş verən qlobal dəyişikliklərlə əlaqədar elmin vəzifələri, elm və texnikanın inkişafındakı yeni amillər, ali təhsil sahəsindəki təmayüllər və yeni tədqiqat üsulları ilə bağlı müzakirələr aparıblar.

Azərbaycan MEA-nın prezidenti, akademik Mahmud Kərimov, Azərbaycan Respublikası prezidenti yanında Elmə Yardım Fondunun sədri Elçin Babayev, Azərbaycanın Macarıstandakı səfiri Vilayət Quliyev Forumun işində iştirak ediblər.

1999-cu ildən etibarən Macarıstanda təşkil olunan Ümumdünya Elm Forumunun növbəti, VI toplantısını Rio-de-Janeyroda (Braziliya) keçirmək qərara alınıb.