Sosial

Ana səhifə

Sosial

Ötən il Azərbaycanda 10615 məcburi köçkünün mənzil-məişət şəraiti yaxşılaşdırılıb

06 mart 2012 15:14 (UTC +04:00)

Bakı. Kəmalə Quliyeva-APA. Ötən il məcburi köçkünlərin sosial müdafiəsi ilə bağlı Azərbaycan prezidenti tərəfindən 1 fərman, 6 sərəncam imzalanıb, Milli Məclis 1 qanun, Nazirlər Kabineti isə 12 qərar və sərəncam qəbul edib. APA-nın məlumatına görə, bu barədə Azərbaycan hökumətinin Milli Məslisə təqdim etdiyi illik hesabatda bildirilir. Hesabatda qeyd edilib ki, 2011-ci ildə Azərbaycanda 2123 ailənin, 10615 məcburi köçkünün mənzil-məişət şəraiti yaxşılaşıb. Bu məqsədələ 168,5 milyon manat (140 milyon manat Dövlət Neft Fondundan , 28,5 milyon manat isə investisiya vəsaiti) ayrılıb ki, bu da 2003-cü illə müqayisədə 8,4 dəfə çoxdur.

2004-2011-ci illər ərzində məcburi köçkünlərin sosial müdafiəsinin yaxşılaşdırılması məqsədilə Azərbaycan prezidentinin ehtiyat fondundan 17 milyon manat, Dövlət Neft Fondundan 799,4 milyon manat və digər mənbələrdən 47 milyon manat ayrılıb. Ayrılan 863,4 milyon manat vəsait hesabına 15000 ailə, 68000 nəfərdən çox məcburi köçkün üçün bütün zəruri sosial, texniki infrastruktura malik 45 qəsəbə və fərdi evlər inşa edilib.

Bundan başqa, 21600 ailə, 110 min nəfərdən çox daimi məskunlaşmamış qaçqın və məcburi köçkün üçün 1218 min kv. metr sahəsi olan 70 qəsəbə və çoxmərtəbəli evlərdən ibarət məhəllə və fərdi evlər inşa edilib, 128 məktəb, 5 musiqi məktəbi, 42 uşaq bağçası, 46 tibb müəssisəsi, 33 rabitə evi tikilib, 582,5 kilomertr yol, 702,5 kilometr su, 1130 kilometr hava elektrik, 185,6 kilometr qaz, 38,4 kilometr kanalizasiya, 6,3 kilometr istilik xətləri çəkilib, 589 müxtəlif gücə malik elektrik transformatoru quraşdırılıb.