Sosial

Ana səhifə

Sosial

Azərbaycan millət vəkili Gülər Əhmədova Türkiyədə beynəlxalq simpoziumda məruzə edəcək

17 aprel 2012 21:23 (UTC +04:00)

APA-nın məlumatına görə, Avropa Birliyi, Avropa Şurası, Mərmərə Universitetinin də təşkilatçıları arasında olduğu simpoziumun məqsədi sosial elmlər, vətəndaşlıq tədrisində meydana gələn yeni tendensiyalar və problemləri araşdırmaq, yerli və beynəlxalq siyasətdə baş verən prossesləri nəzəri cəhətdən təhlil etməkdir.

Tədbirdə Azərbaycan Milli Məclisinin üzvü Gülər Əhmədova “Yaxın Şərqdə dünyəvi təhsilin vətəndaşlıq mərhələləri” adlı məruzə ilə çıxış edəcək.

Millət vəkili məruzəsində Yaxın Şərq ölkələrindəki proseslərə toxunacaq, bu coğrafiyada qlobal təhsilin formalaşması mərhələlərini analiz edəcək.

G. Əhmədova deyib ki, məruzəsi onun üzərində çalışdığı doktorluq dissertasiyamın tərkib hissəsidir. O bildirib ki, dissertasiyasının mövzusu siyasi psixologiyaya aid olduğundan adətən bu istiqamətdə təşkil olunan beynəlxalq elmi konfrans və simpoziumlarda iştiraka üstünlük verir.

G. Əhmədova bildirib ki, Mərmərə Universitetindəki tədbirdə edəcəyi məruzədə Yaxın Şərq ölkələrində baş verən hadisələrə, inqilab və vətəndaş qarşıdurmalarına elmi-nəzəri arqumentlərlə münasibətini bildirəcək.

Qeyd edək ki, simpoziumun elmi şurasında Türkiyənin müxtəlif universitetlərindən, habelə ABŞ-ın Pensilvaniya Dövlət Universiteti, Missuri Universiteti, Florida Beynəlxalq Universiteti, Şərqi Miçiqan Universiteti, Ohayo Dövlət Universiteti, Böyük Britaniyanın Layçaster Universitetinin professor və müəllim heyəti təmsil olunub.

G. Əhmədova may ayı ərzində Türkiyənin Yıldız Teknik Universitetində uşaq hüquqları, Ankaradakı beynəlxalq konfransda isə digər elmi məsələlərlə bağlı çıxış edəcək.

O, həmçinin türk dövlətlərinin xarici siyasəti ilə bağlı kitabının işıq üzü görəcəyini də bildirib: “Bu kitab son illər apardığım araşdırmanın nəticəsi olaraq geniş oxucu kütləsinə təqdim ediləcək.”