Sosial

Ana səhifə

Sosial

TQDK: Bəzi abituriyentlər təkrar sınaq imtahanlarında iştirak edərək nəticələrini süni şəkildə artırırlar

18 aprel 2012 14:23 (UTC +04:00)

Bakı. Kəmalə Quliyeva-APA. “Ötən sınaq imtahanları ilə bağlı aparılan təhlillər göstərir ki, bəzi abituriyentlər ilk sınaqda iştirak etdikləri halda, təkrar sualların təqdim edildiyi növbəti sınaq imtahanına da qatılırlar. Bu zaman suallar barədə məlumatlı olduqlarına və artıq düzgün cavabları bildiklərinə görə, onların sınaq imtahanı nəticələrində süni artım müşahidə edilir”.
Tələbə Qəbulu üzrə Dövlət Komissiyasının (TQDK) mətbuat xidmətindən APA-ya verilən məlumata görə, təkrar sınaqlarda iştirak edən abituriyentlərdən bəzilərinin birinci imtahanda 150, 211, 295 bal topladıqları halda, “tanış suallar” nəticəsində təkrar imtahanda 600-dən yuxarı, bəzən isə hətta 700 bal toplayanlar olub: “Təcrübə göstərir ki, belə hallar valideynlərdə öz övladlarının bilik səviyyəsi ilə bağlı yanlış təsəvvürlərin yaranmasına gətirib çıxarır. Xüsusilə nəzərə alsaq ki, imtahan texnologiyaları ilə bağlı məlumatlı olmayan valideynlər bu cür “yüksək” nəticənin təkrar sınaqdan qeydə alındığını bilmir, sonradan qəbul imtahanlarında övladlarının yaxşı nəticə əldə etmədiyini öyrəndikdə təəccüblənirlər. Unutmaq lazım deyil ki, sınaq imtahanlarının nəticələri ali məktəblərə qəbul olmaq üçün həlledici rola malik deyil. Bu sınaqlar yalnız abituriyentlərə özlərini real imtahan şəraitində hiss etmək, qəbul imtahanlarına psixoloji cəhətdən uyğunlaşmaq, ayrılmış vaxtdan səmərəli istifadə etmək kimi bacarıqlarının inkişaf etdirilməsi məqsədilə keçirilir”.
Qeyd edək ki, TQDK tərəfindən aprelin 8-dən etibarən abituriyentlərin qəbul imtahanlarına səmərəli hazırlaşmalarına, onlarda imtahan vərdişlərinin formalaşmasına və bilik səviyyələrinin real qiymətləndirilməsinə kömək məqsədilə Bakı şəhərində, respublikanın digər şəhər və rayonlarında, həmçinin Naxçıvan Muxtar Respublikasında sınaq imtahanları keçirilir. İmtahanların iyun ayının 10-dək keçirilməsi nəzərdə tutulub.