Sosial

Ana səhifə

Sosial

Azərbaycanda Çernobıl əlillərinə birdəfəlik maddi yardımlar verilib

26 aprel 2012 13:33 (UTC +04:00)

Bakı - APA-Economics. Əmək və Əhalinin Sosial Müdafiəsi Nazirliyinin (ƏƏSMN) müvafiq əmrinə əsasən, Çernobıl qəzasının 26-cı ildönümü ilə əlaqədar 500 nəfər Çernobıl əlilinə birdəfəlik maddi yardımlar verilib.
Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, ƏƏSMN yanında Dövlət Sosial Təminat Xidməti “2012-ci ildə əlillərin və sağlamlıq imkanları məhdud uşaqların sosial müdafiəsi və reabilitasiyası Proqramı”nda əlillərin asudə vaxtının təşkili məqsədilə onların istirahət zonalarına göndərilməsinin nəzərdə tutulduğunu bəyan edib.

Bununla əlaqədar Bakı, Sumqayıt şəhərlərində və Abşeron rayonunda yaşayan əlillərin İsmayıllı və Lənkəran rayonlarında, həmçinin Nabranda yerləşən istirahət zonalarına göndərilməsi ilə bağlı işlərə başlanılıb. Bu tədbir çərçivəsində il ərzində 1000 nəfərdən artıq əlilliyi olan şəxsin qeyd olunan istirahət zonalarına göndərilməsi təşkil olunacaq.
Artıq bir neçə qrup müvafiq istirahət zonasına göndərilib və onların istirahəti xüsusi mədəni-kütləvi proqram əsasında təşkil edilib. Belə ki, mədəni-kütləvi proqram çərçivəsində stolüstü oyun yarışlarının keçirilməsi, idman alətləri ilə məşqlər (trenajorlar), gəzinti turlarının təşkili və tarixi yerlərlə tanışlıq, tibbi və fizioterapevtik prosedurlar həyata keçirilir.
İstirahətə göndərilən şəxslər arasında Azərbaycanın ərazi bütövlüyü və Konstitusiya quruluşu uğrunda döyüşlərdə fiziki sağlamlığını itirmiş vətəndaşlar üstünlük təşkil edirlər.