Sosial

Ana səhifə

Sosial

Rusiya ali məktəblərində Azərbaycan vətəndaşlarına ayrılan yerlər üçün sənəd qəbulu bu gün başa catır

08 may 2012 07:39 (UTC +04:00)

Bakı. Kəmalə Quliyeva – APA. Rusiya Federasiyası ali təhsil müəssisələrində Azərbaycan vətəndaşlarına ayrılan yerlərə keçiriləcək müsabiqədə iştirak etmək üçün sənəd qəbulu bu gün saat 17.00-da başa çatacaq. Tələbə Qəbulu üzrə Dövlət Komisiyasının (TQDK) mətbuat katibi Elnur Nağızadənin APA-ya verdiyi məlumata görə, aprelin 26-dan indiyədək 94 nəfər sənəd verib. Rusiyanın ali təhsil müəssisələrində Azərbaycan gəncləri üçün bu il 30 yer ayrılıb. Onlardan 9-u I qrup, 6-sı II qrup, 9-u III qrup, 6-sı IV qrup üzrədir.
Müsabiqəyə qatılmaq istəyən abituriyentlər Azərbaycanın ali təhsil müəssisələrinin qəbul imtahanında iştirak etmək üçün doldurduqları “Elektron ərizə”ni təsdiq etdirdikdən sonra TQDK-da təşkil edilmiş Sənəd Qəbulu Komissiyasında qeydiyyatdan keçməlidirlər. Rusiya Federasiyası ali təhsil müəssisələrinə müsabiqə iki mərhələdən ibarət olacaq. Müsabiqənin test imtahanı mərhələsi mayın 15-də keçiriləcək. Abituriyentlər “İmtahana buraxılış vərəqəsi” mayın 11-dən etibarən TQDK-nın internet saytından çap edib götürəcəklər. Test imtahanı nəticəsində I ixtisas qrupunda 300 və daha yüksək, digər qruplarda 400 və daha yüksək bal toplayan abituriyentlər II mərhələyə - müsahibəyə buraxılacaqlar. Müsahibə mayın 23-də keçiriləcək.

rusiya_imtahan