Sosial

Ana səhifə

Sosial

Tələbələr arasında keçiriləcək “Univision” mahnı müsabiqəsinin devizi müəyyənləşib

09 may 2012 07:54 (UTC +04:00)

Bakı-APA. Azərbaycanda ilk dəfə olaraq tələbələr arasında 17 may tarixində Heydər Əliyev adına Sarayda keçiriləcək ”Univision” mahnı müsabiqəsinin devizi məlum olub. Gənclər və İdman Nazirliyinin mətbuat xidmətindən APA-ya verilən məlumata görə, müsabiqənin yarımfinalı 15 may tarixində olacaq. Müsabiqədə qalibiyyətin, ali təhsil ocağında birinciliyin işarəsi olaraq deviz “Birinci ol” adlandırılıb.
Devizin müəyyən olunması üçün aprel ayının 26-dan başlayan müsabiqəyə 10 gün ərzində ali təhsil ocaqlarının tələbələrindən 100-dən çox təklif daxil olub. Tələbələr devizin seçimində daha çox tələbəlik və birincilik sözlərindən istifadə ediblər. Devizin seçimi ilə bağlı keçirilən müsabiqə zamanı ən çox fəallıq göstərən unversitetlər Bakı Slavyan Universiteti, Bakı Dövlət Universiteti, Azərbaycan Dillər Universiteti, Xəzər Universiteti və İqtisad Universitetləri olub. Nəticə etibarı ilə verilən qərara əsasən deviz “Birinci ol” adlandırılıb. Bununla yanaşı hal hazırda metro stansiyalarda və şəhərin mərkəzi küçələrində “Univision” layihəsi ilə bağlı bilbordların asılması işlərinə başlanılıb. Eyni zamanda, universitetlərdə tələbələr tərəfindən fəal şəkildə fan klublar yaradılır.
Qeyd edək ki, “Univision” mahnı yarışması Gənclər və İdman Nazirliyi və Azərbaycan Tələbə Gənclər Təşkilatları İttifaqının (ATGTİ) birgə təşəbbüsü ilə həyata keçiriləcək. Gələcəkdə bu musiqi yarışmasına xarici ölkələrdən olan universitetlərin də cəlb olunması istiqamətində işlər görülür.

“Univision” tələbə mahnı yarışmasına Azərbaycanın 26 universitetindən tələbələr qatılacaq. İki mərhələdə keçiriləcək yarışmanın finalına 10 universitet vəsiqə qazanacaq. Qaliblərə yarışmanın və ittifaqın siması olmaqla bərabər, mükafat da veriləcək. Müsabiqənin münsiflər heyəti gizli tərkibdən təşkil olunacaq ki, burada təmsil ediləcək şəxslərin kimliyi açıqlanmayacaq. Səsvermə gizli tələbə şuraları tərəfindən gerçəkləşəcək.