Sosial

Ana səhifə

Sosial

Cənub bölgəsində alman faşizmi üzərində qələbənin ildönümü qeyd olunub - FOTO

Cənub bölgəsində alman faşizmi üzərində qələbənin ildönümü qeyd olunub - <font color=red>FOTO</font>

09 may 2012 15:11 (UTC +04:00)

Lənkəran. Ağəddin Babayev – APA. Faşizm üzərində tarixi qələbənin 67-ci ildönümü Azərbaycanın cənub bölgəsində təntənə ilə qeyd olunub. APA-nın yerli bürosunun məlumatına görə, Lənkəranda bayram tədbiri şəhərin mərkəzində ucaldılmış naməlum əsgərin abidəsinin ziyarəti ilə başlayıb. Şəhər İcra Hakimiyyətinin başçısı Taleh Qaraşov, müharibə veteranları, hüquq-mühafizə orqanlarının rəhbərləri abidənin önünə gül dəstələri qoyublar.

Sonra iki dəfə Sovet İttifaqı Qəhrəmanı, tank qoşunları general-mayoru Həzi Aslanovun abidəsi önündə tədbir keçirilib. İcra başçısı Taleh Qaraşov əvvəlcə müharibə veteranları ilə görüşüb, onları bayram münasibətilə təbrik edib və generalın abidəsi önünə gül qoyub. Nəcəf bəy Vəzirov adına Lənkəran Dövlət Dram Teatrının aktyoru, xalq artisti Qabil Quliyev tarixi qələbəyədək azərbaycanlıların, o cümlədən lənkəranlıların cəbhədə göstərdiyi şücaətlərdən, qəhrəmanlıqlardan söz açıb. Müdafiə Nazirliyinin əməkdaşı, Həzi Aslanov irsinin araşdırıcısı, şair Abdulla Qurbani bayram təbriklərini söyləməklə Həzi Aslanova həsr etdiyi yeni kitab haqqında məlumat verib.

Daha sonra T. Qaraşov və digər rəsmi şəxslər Həzi Aslanovun ata ocağı Gərmətük qəsəbəsinə gedərək burada qəhrəmanın büstünü ziyarət ediblər. İcra başçısı qonaqlarla birlikdə Həzi Aslanovun Lənkəran şəhərindəki Ev Muzeyinə də baş çəkib.

Masallı rayonunda da silsilə tədbirlər keçirilib. Rayon İcra Hakimiyyətinin başçısı Rafil Hüseynov, hüquq-mühafizə orqanlarının rəhbərləri, müharibə veteranları Şəhidlər Kompleksindəki abidəni ziyarət edərək önünə gül dəstələri düzüblər. Tədbir bayram süfrəsi arxasında davam etdirilib. Sonda veteranlara maddi yardım göstərilib.

Astarada isə qələbənin 67-ci ildönümünə həsr olunmuş mərasimin iştirakçıları əvvəlcə Qəhrəmanlar Bağında sovet ittifaqı qəhrəmanları Ziya Bünyadovun, Mirzə Cəbiyevin və İlya Koverinin, “Şöhrət” ordenlilər Ağahəsən Nəhmətov və Rəhmət Hətəmovun büstlərini, “Şəhidlər” abidə-kompleksini ziyarət ediblər. “Şindan” istirahət mərkəzində davam edən bayram tədbiri zamanı rayon İcra Hakimiyyətinin başçısı Qəzənfər Ağayev İkinci Dünya müharibəsinin veteranları ilə görüşərək, onların problemləri ilə maraqlanıb.